發佈時間：11:00 2025-05-13
「視后」李佳芯（Ali）與無綫因續約問題，進行了長久的「拉鋸戰」，直至今年初終於宣布結束12年的賓主關係。而形象健康的Ali，由於深受觀眾及廣告客戶歡迎，故回復自由身後，當然不愁沒出路。早前，她就預告會飛馬來西亞，與舊拍檔黎諾懿合演劇集《義和》。
近日，《東周刊》收到獨家消息，現時有3大娛樂公司看中Ali，覺得她是一粒「金蛋」，所以不惜出動天價加盟費兼6位數字的包月薪制，希望能打動她，但盛傳她就吊高嚟賣，一於女神唔急，等班老闆急吓先喎。
自組「李佳芯工作室」親自接job
早前，Ali向外間報喜，宣布自組「李佳芯工作室」升呢做老闆，兼任經理人親自接job；而狀態大勇的她，最近密密出席商演，收入豐厚，曝光率亦未有因離巢而減低。而每次出席活動，Ali的未來去向都成為傳媒的焦點，她坦言有跟不同公司見過面，也的確與古天樂的公司傾過，又大讚雙方都釋出最大的誠意，但仍是傾談階段。
此外，Ali又承認收過ViuTV的劇本，亦有參與甄選角色，包括：媽媽、心理醫生等，希望遇到一個會心動的角色。Ali還預告將會跟舊拍檔黎諾懿合演馬來西亞劇集《義和》，預計6月底、7月頭開拍，並會在當地逗留兩個多月，劇中更首次飾演江湖大家姐。
3大公司欲奪得美人歸
除古天樂的公司和ViuTV外，還有HOYTV及一些娛樂公司都加入搶人戰團，據密友透露：「3大公司為奪得美人歸，其中一間就開出7位數字嘅加盟費，再加6位數字嘅包月薪制，想以銀彈攻陷Ali。即係話就算經濟不景，Ali每個月都穩袋6位數，確保女神完全冇經濟壓力，待遇非常吸引。另外，有公司更承諾過檔後，保證佢坐一姐之位，又講明兩年最少開3套劇集俾佢，全部都係做女一，同埋Ali仲有話事權揀拍檔，自由度極高。」
各大娛樂公司開出如此優厚的條件，可惜仍未成功打動Ali立刻落筆簽約，密友再爆料：「Ali經歷TVB雪藏冇工開嗰段漫長嘅日子後，點會冇陰影呀？所以今次再揀新公司，佢都非常謹慎。除咗睇錢，佢同身邊人講要有自由度、有權話事，一定唔會再簽『長命約』喎。其實，有一間娛樂公司提出的條件，Ali都有啲心動，但眼見咁多間公司都向佢招手，女神當然吊高嚟賣，心中有數唔使急慢慢諗！」
性格極「宅」變得進取
而以前性格極「宅」的Ali，自從成立自己的公司後，近月就變得進取，經常搵機會識人，擴闊生活圈子，為事業突然轉「性」。密友續說：「Ali𠵱家自組公司，性格都變得進取咗，幾乎任何活動邀請，佢都逢請必到。早前，劉德華出品嘅舞台劇《你好，打劫！Reunion》首埸公演，Ali收到邀請都二話不說報名，仲叫埋老友楊潮凱同好姊妹梁嘉琪一齊去。以前呢啲活動佢點會咁熱衷，就算冇嘢做都寧願『宅』喺屋企。」
李佳芯豪邁撩牙
日前，《東周刊》就捕獲Ali現身中環置地廣場跟兩位女友人食飯。當日，一身白衫打扮配上西裝褸的她，素顏上陣，雖然面色帶點蒼白，但依然仙氣十足！現場所見，Ali與友人全程有講有笑，更一度劈大個口大笑，看來成為搶手貨，令她心情極靚！席間，她不時拎出電話覆訊息，與友人聊天時，又豪邁地拿起牙籤撩牙，完全沒有女神包袱。期間，有餐廳職員上前要求合照，Ali都非常親民，有求必應。食到大約晚上7點，她就在友人陪同下去置地商場門口搭的士離開。
另一日出席活動後，Ali又馬不停蹄地去影廣告硬照，密密吸金。那天，她孖住工作人員乘坐7人車到達荃灣一棟工廈，現場所見，有助手、化妝師、髮型師等護駕，一行5人傍住開工，「視后」排場依然架勢。拍攝大約5小時後便順利完成，Ali充滿笑容地離開，接着乘坐7人車返回貝沙灣的豪宅，對住無敵大海景，消除雜念，應該很快挑選到下一個老闆。
