發佈時間：02:36 2025-04-29
在娛圈中，現年74歲的譚詠麟（阿倫），與74歲的陳百祥（阿叻）出名老友鬼鬼；不過，兩人在去年卻傳出因「明星足球隊」反目。事緣，阿叻另組「精裝明星足球隊」，而為增強「星味」更挖走馬國明、林文龍、洪天明、劉浩龍等年輕一輩的球員，就連溫拿成員彭健新，都「叛變」加入其陣營。
對於另起爐灶的因由，阿叻表示各有不同要求，以及想將球隊年輕化；此外，他又笑稱自己退休後只有踢波，不像阿倫喜歡錢，狂開巡迴演唱會，話中有骨。日前，《東周刊》就發現，陪伴「明星足球隊」練波的阿倫，一臉愁爆！
阿叻突然另起爐灶
據知情者爆料，自「明星足球隊」分家後，阿倫亦眼紅阿叻的新隊人才鼎盛，於是點名力捧男團「老六兄弟」的衛志豪、莫家淦、張智軒、潘梓鋒、羅鈞滿及伍偉樂，揚言要撼贏阿叻。而為捧紅「老六兄弟」，阿倫出盡法寶兼碌盡人情卡，既安排他們現身TVB的《博愛歡樂傳萬家》，又接受新城電台訪問；期間，他更撲去電台驚喜現身！
在節目中，阿倫還激罕地爆阿叻脫離「明星足球隊」另起爐灶的內幕︰「真係有呢件事，空穴來風必有因，佢同我哋嘅風格有些少唔同，因為佢比較肉緊啲，我哋比較嬉戲啲，大家睇法唔同⋯⋯相信有一日，佢迷途會返嚟；但佢未必迷途，可能佢方向啱都未定，我都希望佢做到自己鍾意嘅。」
現時，兩個老友分頭「搵食」，阿倫的「明星足球隊」以慈善為主，打波比賽的收益扣除開支後，會捐贈不同機構幫助有需要的人，核心隊員包括：黃日華、張兆輝、何家勁、羅家英、曾志偉等。至於，阿叻和王晶牽頭的「精裝明星足球隊」則以賺錢為主，閒時會搞騷吸金，隊員亦略為年輕一點，包括：馬國明、孫耀威、崔建邦、劉浩龍等。據知情者透露：「兩邊關係一度非常惡劣，原本一大班人一齊玩，阿叻突然另起爐灶，又叫大家要揀定靠邊面，揀定咗只可以踢一邊，唔可以食兩家茶禮。」
洪天明、馬國明慘做磨心
復活節期間（4月19日﹚，阿叻就率領「精裝明星足球隊」，到廣西邊城崇左市與當地球隊展開友誼賽。期間，阿叻在社交網分享了多段花絮片，片中有王晶、陳浩民、陳國坤、王敏德、陳庭威、苑瓊丹、夏文汐等。在中場休息時，還見孫耀威獻唱〈愛的故事〉娛賓；另陳浩民等人則合唱Beyond的經典歌〈不再猶豫〉，炒熱全場；不過，在宣傳海報中企正C位的「視帝」馬國明，就未見蹤影。
知情者繼續爆料：「其實洪天明、馬國明都係想踢吓波，玩吓友誼賽，兩個偏向中立，冇意思捲入是非之間。上年，馬國明都有跟叻哥出賽，而洪天明亦有現身『明星足球隊』嘅活動，不過如果要佢哋靠邊，佢哋寧願唔玩。」
阿叻、王晶頻頻參與海外友誼賽
分家後，這邊廂的阿叻同王晶非常積極，頻頻參與海外友誼賽，又不停出活動及拍片營造聲勢；另一邊廂的阿倫，則揚言一定要捧紅「老六兄弟」，可是反應卻一般，成績未如理想。日前，《東周刊》就獨家捕獲「明星足球隊」現身九龍灣球場踢波，隊員：包括黃日華、張兆輝、關禮傑、衛志豪、鄧兆尊等陸續到場。現場所見，一身恤衫加長褲的阿倫，壓軸現身，原來他僅來觀戰，並沒有落場。
期間，阿倫坐在場邊的長櫈與波友「吹水」，全程愁爆零笑容，更不時躁爆行出中間向隊員指指點點，心情唔多靚！完場時，一眾隊員開心影大合照，他也未有埋堆，反而悶悶不樂坐埋一邊狂撳電話；之後，他更第一個率先離開，而各人亦陸續換衫散場。
