發佈時間：10:00 2023-09-18
海，海，海，全部都是海。
08年港姐季軍馬賽，早前帶着4歲女兒Camellia和媽媽，去了泰國布吉和曼谷旅行。她笑言因自己是夏天出世的小朋友，所以15日的旅程，重點是潛水、滑浪和曬太陽。
「潛水畀我活在當下嘅感覺，人喺海底會變得謙卑，唔會諗太多嘢，一呼一吸，其實我哋都係大自然嘅一員，好渺小，要感恩。望住啲魚，佢哋都唔會覺得我哋奇怪。」
與大自然共存，學會感恩，人生多美好。
考潛水牌12年
有份在內地熱爆新片《孤注一擲》參演一角的馬賽，疫情後未去過旅行，加上之前懷孕後都冇潛過水，所以她早前就飛去泰國度假，一次過滿足兩個願望。
布吉皇帝島水清沙幼，出發前，馬賽只記得帶潛水衣，去到當地才臨急臨忙買比堅尼曬太陽。
「我考咗潛水牌12年，可能呢幾年經歷多咗，又做咗媽媽，今次再潛水，對大自然有重新認識。禪師成日話：『一呼一吸就係生命』，喺海底世界，人被逼專注呼吸，少諗其他嘢。地球70%係海洋，海底擁有嘅嘢比陸地多，好感謝魚同生物，潛水令我有種親近地球母親（mother earth）嘅感覺。」
潛水叻，但在大海滑浪卻是首次，馬賽坦言有點驚，「今次跌落大海，冇之前喺北京跌落室內嘅人造浪咁痛。滑浪好有趣，好似人生咁 ，要時刻面對挑戰。」
馬賽喜歡大海，有種返娘家的感覺，女兒Camellia也一樣，在海邊玩水堆沙玩到不願走，馬賽反而擔心她玩得太久會冷親。「阿女水性OK，我哋之前上過7、80堂親子游水堂。今次旅程，我曬黑咗少少，不過冇所謂啦！」
教育女兒敬畏心
馬賽學佛，專登請來導遊講解曼谷大皇宮的文化及歷史給Camellia聽，希望她無論有否宗教信仰，都要對大自然有敬畏的心。
「呢種教育好重要，喺阿女身上亦發揮到作用。佢好有愛心，見到昆蟲翻轉肚，會話：『媽咪，不如我哋救下佢啦！』」
在朋友的推薦下，馬賽帶女兒到Safari World睇野生動物，大開眼界，覺得充滿80年代感覺，一切好原始，能近距離見到鱷魚和巨龜等。「阿女餵咗少少長頸鹿就驚，要拉住我。我唔驚，嘗試同佢哋傾偈，佢哋仲舔我㖭。」歡樂過後，回程就經歷大塞車，塞了近兩小時，令她們怕怕。
除了咖喱和芒果糯米飯，茹素的馬賽也吃了一些性價比高的地道粉麵，每碗50泰銖（約$11港元）起就有交易。有檔淨食菜的，醬汁更多達10多款，好味到癲。
「下次想去馬爾代夫旅行，好鍾意大自然嘅風光。日本開始排放核污水，所以我想盡快潛水，擔心以後潛冇咁好。如果冬天去，就想去新疆滑雪，聽講粉雪好靚。」
編排旅程雖然辛苦，但換來難忘回憶，最是無價。
