發佈時間：15:45 2025-04-16
由陳山聰、張振朗、劉佩玥（Moon）、劉穎鏇（Tiffany）、丁子朗和郭柏妍合演的TVB劇《奪命提示》將於下周進入結局篇。在劇中飾演神秘訊息情報科（ASIB）頭目的陳山聰，之前出席劇集宣傳活動時，曾揚言手上持有大量「隊友」瞓覺相！昨日（15日）他帶頭「找數」，在個人社交網PO出3張自己的瞓覺相，並着「隊友」跟風PO相。搞笑的是，走開潮人路線的陳山聰，連瞓覺都不自覺擺甫士，即被「隊友」留言取笑，之後張振朗更風趣分享瞓覺必靚秘訣。當中最慘應是郭柏妍，原來她企棟棟睡姿是因為發住高燒拍攝，故一有時間便隨便搵個位「補眠」養足精神拍下一場，真專業！
丁子朗半開眼瞓覺神乎其技
昨日陳山聰在個人社交網PO出3張自己的瞓覺相，並Hashtag「瞓覺相challenge」，着「隊友」跟風PO相。搞笑的是，潮人陳山聰就連瞓覺都不自覺擺甫士，即被隊友留言取笑，其中張振朗就落足鞋油稱：「阿頭～犯晒規喎，瞓覺都可以咁型。」
未幾，ASIB其他隊員包括張振朗、阿Moon、Tiffany、丁子朗和郭柏妍相繼上載瞓覺相，當中最吸睛的是丁子朗的「半開眼瞓覺相」及郭柏妍的「直立式瞓覺相」。對於丁子朗能半開眼瞓覺，隊友均嘖嘖稱奇，陳山聰搞笑留言指：「我有理由懷疑你係反我眼。」張振朗也抵死和應：「子超，你唔好有事？」令阿Moon也忍不住大笑。至於郭柏妍的企棟棟睡姿，則獲隊友封為「可愛睡模」。
郭柏妍企棟棟睡姿有段故
而搞笑還搞笑，郭柏妍的企棟棟睡姿背後原來有段故。事緣她當日發高燒，但因不想影響劇組拍攝進度，她一直沒有說出自己發燒實情，就連監製Jazz也是最近才知道她當日強頂高燒拍攝。郭柏妍憶述當時情況真的蠻辛苦，幸獲劇組貼心照顧：「嗰時都病得好緊要，同埋發好高燒，但因為嗰時啲Rundown已經排晒，我見到我當日要拍嗰場被綁架戲又涉及好多唔同嘅工作單位，如果甩咗呢場我怕會浪費好多人力物力，所以我都頂硬上，希望可以順利完成。劇組好好，喺唔需要我嘅場口都畀我休息，瞓一瞓好好多。」另照片所見，郭柏妍的美腿還佈滿蚊赧，原來她之前在南生圍拍攝重頭打鬥場面時，被蚊咬到一腳都是，認真我見猶憐！
張振朗分享瞓覺必靚秘訣
至於張振朗與Tiffany的「同框瞓覺甫」，則遭監製Jazz取笑：「識睇梗係睇腳！」原來驟眼看張振朗彷似將腳晾在Tiffany腳上睡覺，但實情只是角度問題，Tiffany更搞笑叫張振朗：「Please move your leg!」相當識玩。長期口多多的張振朗，再風趣分享瞓覺必靚秘訣：「識瞓一定係gel晒頭、着晒皮褸，或者着禮服瞓覺，咁喺呢個世界就冇人可以影到我樣衰嘅瞓覺相啦！」
延伸內容：劉穎鏇、郭柏妍組「查案女團Double C」「橙色女僕水著」造型巧吸睛 !
延伸內容：陳山聰自爆慘遭劉佩玥奪愛
延伸內容：丁子朗 葉問上身
《東周網》訪談系列節目《星桄伴我心》4月重磅嘉賓：
即睇：倪樂琳曾因心口胎記感自卑 爆媽媽鍾意某男星
即睇：黃秋生剖白人生幾段情 愧對亡母，對花槽祭父，大仔生死劫，細仔嗲功攞錢
