發佈時間：16:50 2025-03-10
昆蟲，一向予人印象不佳，但6隻腳之下，總有知音人。
34歲的吳業坤，是其中一位欣賞昆蟲的人，是把其粉絲群命名為「坤蟲」的程度，還引起了網友的關注。
「以前係叫『知音』，因為我細個就諗叫粉絲唔係太友善，所以就叫我嘅粉絲做『知音』。突然唔知幾時興起粉絲要改名嘅風氣，我諗咗好耐用我個名可以做啲咩，唯一諗到嘅就係『坤蟲』。
「一般人覺得昆蟲可能好噁心、好恐怖，我就特意顛覆呢件事，做了螢火蟲嘅會徽，令大家覺得做昆蟲都可以好可愛。而昆蟲喺我眼中仲好有大自然嘅感覺，我鍾意綠色，又可以食字，係估唔到迴響會有啲大啫。」
娛樂圈是極限職業，吳業坤坦言一直在調整心態，但他慶幸自己的樂天性格，令他可從中尋找人生的意義。
「我由入行到𠵱家，都覺得咩都可以解決嘅，所以唔會有好大壓力，可能只係純粹做嘢做到好攰。𠵱家我學識Work-Life Balance，雖然人哋講過好多次，但真係Work！𠵱家我有興趣玩空手道，令我知道原來人生，唔係得工作俾到我滿足感。
「即係就算我𠵱家呢首歌唔Hit，唔緊要，咪做下一首囉；但我可能喺空手道比賽，或者練習嘅時候，可以拎番嗰種滿足感，咁先叫平衡。有時淨係顧住工作，冇咗自己嘅人生，其實都幾唔好。」
要自我滿足，不需上山下海，猶如昆蟲般靈活走位，Chill點更好。
吳業坤以「低能」來形容自己
入行15年，頭5年的工作，可謂跟吳業坤的本業唱歌無關，他以「低能」來形容曾幾何時的自己。
「2010年開始比賽，係《巨聲2》嘅時候；〈原來她不夠愛我〉都已經係10年前嘅歌，我都變得冇咁年少氣盛。以前⋯⋯可能後生啲，我諗起都好低能，買一碗車仔麵都可以Post，Search『原來他不夠愛我』，少咗一個餸，就係『原來他不夠愛我』⋯⋯
「以前好無聊，但大家又受落，𠵱家我絕對唔會做呢啲，因為好怕醜、尷尬，放喺網上嘅嘢，都反映到自己嘅一面，我唔想再咁低能。
「以前嘅我其實好厚面皮，雖然𠵱家都厚，但以前厚好多，講嘢成日唔經大腦，想講笑，但係撞咗好多次板之後，我就變得慎言咗。」
跌得甘，才令他有180度的轉變。
「2016年我第一次開紅館Show，當時出完活動，有記者問我怕唔怕賣唔晒飛，我衝口而出話一日都買得晒，呢句就成為咗標題。大家開始攻擊，話我好囂，我仲記得有人話要寄信去政府唔知邊度，想阻止呢件事發生。我平時講呢啲當係同朋友傾偈，但原來咁講會咁嚴重。
「到𠵱家，我就慢慢減少咗呢啲說話，一啲事發生喺其他人身上，可能會被標籤敢言，但嗰個係我嘅話，會變咗唔同嘅形容詞。喺另一個角度睇，咁令我個人簡單咗好多，唔使諗太多要去咩負責任，唔講就唔會錯，亦都唔會影響到其他人。
「有個前輩都同我講過，做訪問唔好提到其他人嘅名，講自己就好，我講人哋以為係玩吓，但其實有啲人會介意，覺得我抽佢水。
「𠵱家就會學識呢樣嘢，所以講一句說話，要諗好耐先會有Output，諗會唔會出現問題，令我𠵱家講嘢好無趣，但點樣係有趣？我又未拿捏到。」
求生不能單一 吳業坤還懂變通
吳業坤的新曲〈愛情求生案內書〉，是他幾經考量踏出的一步。
「歌係2024年做嘅，之前我做咗啲日系嘅歌，好似比較深咗啲，而今次我都有研究自己應該去咩方向，點先叫做『流行』⋯⋯首先近情人節出嘅歌，我就揀一首甜蜜嘅情歌，仲有唱法同旋律，都同過往好唔同。」
除了演繹方式，他坦言新曲也是其現實寫照。
「我相信呢首歌係天下男士嘅寫照，點解叫『案內書』，即係一本手冊，其實所有嘅男性都可以通用，按住呢本手冊，去同另一半相處，應該就冇死！成為咗人夫之後，我將求生嘅心態同技能，都放晒入首歌度。
「例如假設另一半剪咗頭髮，佢唔會直接講，而係會問你覺得有咩唔同咗，就算你發現唔到，佢最後都會講：『我剪咗個蔭。』，然後你就要俾一個好好嘅反應，『嘩！好靚喎！』。呢啲情緒價值，都係一個求生技巧。」
求生不能單一，吳業坤還懂變通。
「同一招當然唔會做得太多，而且有時都要用心去演戲，要善意去撒謊。」
面對結婚兩年多的日本太太濱口愛子，即使有文化差異，吳業坤也會做足本分。
「我係一個幾實際嘅老公，雖然我試過買好大紮花，慶祝老婆生日，但呢啲做咗就夠嘞，係一個紀念，亦都冇理由再做同一件事。去年佢生日，我哋去咗瑞士旅行，用唔同嘅方式慶祝，好實際嘅。
「有咩事發生，可能嗌交，我永遠都會話，去食佢鍾意食嘅嘢，應該係最實際解決嘅方法。佢鍾意食串燒，可能未講Sorry，就叫佢一齊去食。」
兩口子於磨合中，小吵小鬧是在所難免，吳業坤偶爾也會因語言而迷失。
「我哋鬧交係講日文嘅，因為佢廣東話又未係好厲害，佢啲廣東話冇我嘅日文咁好，雖然我都唔係好好，但唯一可以溝通到嘅就係日文，最直接，但溝通會出現一啲問題。
「日文唔係我嘅母語，有時啲用詞我以為係好輕，點知原來她聽到嘅，係好過分嘅說話；
反過嚟佢以為係好輕嘅用詞，但我聽到會諗，點解佢鬧得我咁甘，會有好多呢啲誤解。」
找到人生的另一目標
家庭生活甚為圓滿，而早於婚前，吳業坤也找到其人生的另一目標—空手道。
「練咗都有4、5年，當時疫情得閒，喺搵工嘅時候識咗Anthony教練（其空手道教練），佢比我年輕，但有時人生遇到好嘅導師或師傅，好似佢咁願意教我，我又願意做，互相給予，我先可以堅持落去。」
吳業坤表示，空手道讓他重拾追夢的心，並視之為其第二人生。
「以前幻想過嘅，或者一直喺心入面嘅嘢，都已經發生咗，可以開演唱會、可以上台攞新人獎⋯⋯所以呢幾年冇一個每晚諗住、好想做到嘅事。冇嗰個夢想，可能係太快已經做到想做嘅嘢，咁𠵱家做咩好呢？
「有人問我想唔想攞獎，咁當然想！但𠵱家你問我最想做嘅事，反而係可以繼續工作、工作順利。有時話第二人生、第三人生、第四人生，我希望喺空手道上面有啲成就。
「當時啱啱學嘅時候，我希望可以加入港隊，𠵱家都有可能嘅，我覺得呢個對我嚟講係一個好好嘅成就。雖然喺其他人眼中，未必係一件大事，但𠵱家喺我嘅生命入面，除咗唱歌，第2就係希望喺空手道上面，有啲嘢發生。」
追夢的同時，他還十分實際。
「賺多啲錢其實我一直諗緊，所以都開始做啲小型嘅生意，同東閔（謝東閔）有個歌唱學校，都會繼續做；另外今年我都試吓加入Anthony嘅學院，做老闆，開拓一啲新嘅嘢。雖然就嚟35歲，但我認識身邊嘅朋友，就算年紀比我大嘅，都繼續追尋夢想。」
童話故事下集
一般的童話故事，總是「快快樂樂地生活下去」，回歸現實，是否如此理想？
吳業坤與其「女王」濱口愛子，於剛過去的農曆新年所派的利是，利是封都是經專人特別設計，而在當事人的眼中，還多了深層的寓意。
「𠵱家做咗人夫，呢啲利是封俾多咗我一個對家庭嘅觀念。之前同媽媽一齊住，早出晚歸，好少會特登留喺屋企，都係出去做Gym或者食飯，睇吓點樣都填滿自己嘅生活。𠵱家就算放假都唔一定出去街，花多啲時間喺屋企，或者一齊放狗，多咗概念圍繞喺呢個家。」
為人夫已兩年多，吳業坤表示暫未有打算為人父。
「唔係呢一刻嘅事，我都好驚，練空手道有個師兄係爸爸，有時佢練咗1個鐘就話要走，因為要返去照顧個仔，出到嚟1個鐘，已經好難得、好幸福。
「我冇諗過原來係咁嚴重，𠵱家就咁先，俾我再自私多一段時間，做多啲自己鍾意做嘅事。一有小朋友，我嘅人生就奉獻俾佢，所以我想再為自己做多啲啲，我相信生咗小朋友，我都會俾到佢一啲嘢，但喺做人爸爸之前，我要多啲時間俾自己。」
仍享受二人世界的他，坦言多得太太的付出，對枕邊人，他稱：「多謝你離鄉別井，嚟香港同我一齊生活，雖然生活上有好多摩擦，可能係文化嘅差異，仲有工作性質嘅問題，都有好多小摩擦，希望大家都互相理解，共建美好家園！」
美好家園，還要歸功於吳太的麵豉湯。
「我記得有次佢個袋入面有兩個麵豉湯，一睇就知！之前仲有整便當㗎，因為當時我減緊肥，佢就有整俾我。」
話說訪問當日，吳業坤的午餐，是愛妻牌的愛心飯糰兩個，是否童話？已不重要吧。
《東周網》訪談系列節目《星桄伴我心》2月重磅嘉賓：
即睇：七仙羽被鬧神棍 爆喊剖白被欺凌 : 個個都笑我騎呢！
即睇：林盛斌Bob曾當選「我最討厭藝人」冠軍，被踩是垃圾 正能量反省：我做錯咗咩嘢？
即睇：李珊珊罕談舊愛錢嘉樂 剖白患驚恐症瀕死感覺 : 我會活好呢一生!
即睇：朱慧敏第二胎B仔出咗世啦！分享懷胎湊B心得 收蘋果批做結婚周年禮物 又喊又笑講「愛的宣言」
《東周網》訪談系列節目《星桄伴我心》3月重磅嘉賓：
即睇：喬寶寶細仔不良於行 陪伴中風病母 感觸落淚：見得幾耐得幾耐
