發佈時間：14:26 2025-02-19
有「瘦身教主」之稱、創辦Angel Face美顏瘦身專門店的名人唐安麒，近來在社交媒體非常活躍，常拍短片狂爆金句，引起網民熱烈討論，並竟成為騙徒落手的對象，爭點墮入網騙陷阱。
唐安麒在ig story公開Whatsapp對話截圖，內容是一名「朋友」問她是否身在韓國，並突然要求匯錢：「你港幣方便嗎？想用美金和你換一些匯到香港」、「我找代購在香港買了一些東西，我忘記準備港幣。要匯8,700港幣給他，你要是方便幫我匯一下，我匯美金給你」。
十多年冇見台灣舊同事突然要求匯款
唐安麒接受東周網訪問，稱這位「朋友」是十多年冇見的台灣舊同事，間中會私訊問候：「佢問我係咪喺韓國，我仲好開心，以為佢想見面，直至佢提出匯錢，我覺得唔對路，我同佢講有好多詐騙，不如畀我聽吓把聲。我打WhatsApp電話搵佢，打唔通，佢打返畀我時又唔出聲，之後仲反問我：『你個電話係咪壞咗呀？點解冇聲嘅?』」
「朋友」不尋常的舉動，令唐安麒感到奇怪，此時她想起這位舊同事有ig戶口，即在ig私訊求證，對方即回覆否認要求匯款，始發現騙徒駭入whatsapp以進行詐騙，唐安麒說：「最後我Whatsapp騙徒：『你係網絡詐騙』後，立刻block咗佢！本來仲想問多句：『你係咪俾人綁架喺園區、被迫做騙徒？使唔使去救你？』不過諗諗吓都係費事咁講。」
行蹤被掌握 感到十分恐怖
唐安麒稱自己的行蹤被掌握，感到十分恐怖，「初時騙徒識得問我係咪喺韓國，所以我係完全冇懷疑，因過去10年，我有一半時間住喺韓國。我估騙徒hack咗同事個Whatsapp睇晒之前嘅對話，所以識得咁問。大家遇到呢啲情形，幾真都好，一定要求證，例如直接語音對話。」
唐安麒派金句發放正能量
近日唐安麒成為網民熱討對像，因她拍了不少有趣短片，既大派金句又發放正能量。例如曾出版多本關於美容瘦身及「宇宙飲食 」暢順著作，而被封為「瘦身教主」的她，對於現在人人甫見「教主」一詞，即聯想起Anson Lo，片中她笑言：「教主個朵，其實係我先㗎！」她自爆50歲開始增肥，強調「要靚唔要瘦」，瘦都要睇年紀，觸發網民力數圈中多位50+皮包骨女星。她大派心靈雞湯金句，勉勵大家遇困境時別輕易放棄：「天越黑，代表太陽越快出嚟」、「搞到要破產？破囉！破產唔使死㗎！特朗普六次破產，依然可以東山再起。」
相關內容 : 「瘦身教主」唐安麒「唱反調」呼籲唔好瘦身？網民辣評50+暴瘦骨感女星：瘦到走火入魔！
相關內容 : 取代林明禎？大馬女神Miko Wong出任Angel Face品牌大使！唐安麒提倡「宇宙飲食」瘦出健康體質
唐安麒創下經典 將林志玲躍升「台灣第一名模」
唐安麒創下另一經典，是當年睇中還是「奀模」的林志玲 ，經過改造後林志玲索爆拍瘦身廣告而一炮而紅，躍升至「台灣第一名模」地位。點石成金的她，多年來一直主攻美容事業，惟近年和韓國合作成立ACE娛樂集團，在韓國及香港發掘新秀。而她發布的最新一段短片中，她稱自己從不發明星夢，但曾被批命跟娛樂圈有不解之緣。
曾被睇中和吳君如合演《霸王花》
冇刻意入行的她，曾拍維他奶等多個廣告外，更曾被睇中和吳君如合演電影《霸王花》。最後她推卻片約，因如簽約就要放美容及教跳舞的工作：「加上片酬唔多，又唔知簽咗之後係咪繼續有戲拍，所以唔簽。我冇諗過喺娛樂圈發展，但條命同呢個圈有緣。」
唐安麒續指在ig出po後也收到其他朋友反映，指自己同樣被讀取WhatsApp對話並進行行騙！最後她提醒大家，最好在WhatsApp的設定中開啟「雙重認證」等保護隱私功能，以保安全。
《東周網》訪談系列節目《星桄伴我心》2月重磅嘉賓：
即睇：七仙羽被鬧神棍 爆喊剖白被欺凌 : 個個都笑我騎呢！
即睇：林盛斌Bob曾當選「我最討厭藝人」冠軍，被踩是垃圾 正能量反省：我做錯咗咩嘢？
