作為蟻民界的花生友，平日食慣鹹魚白菜加青豆。到糧尾時候，甚至只能一碗白飯淋啲豉油，但求夠糊口。我真的拗爆頭，一餐晚飯點樣可以食到八萬蚊唔計零頭，貧窮真係限制了我的小宇宙。
文華東方酒店彷彿是高不可攀的星宿，出入都是名門大家閨秀，擦身而過隨時是富公子某某，平民百姓唯有路過大門口，望門興嘆甚麼叫派頭。
中菜廳的晚市套餐絕對講究，又鮑魚又官燕仲有M9和牛，每位$2388就可嘆過夠。再畀$200開壺十年普洱潤喉，不就是至高享受？食餐飯畀幾千蚊落樓，初約會的女伴一定冧到透，想親吻或拖手，根本唔使開口，便能馬上擁有。
「借尿遁」黃姓男人曾跟明星合照，包括鄺美雲、米雪等。
最近一名31歲女網友，相信是芳心寂寞想識男朋友，在Telegram認識了一名自稱律師的黃姓單身狗，心靈交流了良久，上周終於到了第一次約會的時候。
既然是首次見面初邂逅，黃男在文華東方訂了枱後，特別提早柯打一支價值$71,800的極品香檳酒，調情氣氛一流，相信誰也會受溝，以為愛上他便是一生最大的成就，這隻金龜還不到手？
誰知黃男呢條友，末段以去廁所為藉口，飲飽食醉便走頭，成晚都冇返轉頭，可憐剩下女網友獨自發愁，要急電救兵來解救，找咗八萬蚊條數才能走。
她自然嬲嬲，氣上心頭，報警聲稱被騙徒呃透，還望條友仔回水認頭，否則一定告上法庭追到瘦。
這件事充滿荒謬，可供大家在茶餘飯後，剝花生剝到中秋，笑大個口。
就是這一支香檳酒，2002年出品，酒店叫價超過七萬元，市價則二萬多元。
疑似八萬蚊晚餐收據曝光。
不少口痕友，都話如果女網友是樣靚胸大又夠瘦，那個有「呃蝦條」前科的黃某，又點會輕易放手，一定唔會開支咁貴嘅酒，實會開埋房happy完先至走，有理由推測女網友唔啱佢胃口，所以吼都唔吼。
仲有，黃某曾因呃女上床衰到透，2023年9月被判囚，要坐2年9個月慢慢反省悔疚。數數手指頭，照理他還未到放監時候，點解可以咁快重獲自由？
再拎張疑似晚餐單據來研究，單是$7677.6的加一服務費已睇到眉頭皺，到底有乜嘢服務咁正斗？還有那支飲完曉飛的酒，叫價七萬多可算是酒中頂流，但原來出面市價只需兩萬多就有，酒店賣貴三倍兼無折頭，食水之深利潤豐厚，誰說餐飲業正陷低潮寒流？
當寂寞剩女遇上食女高手，誰想受溝，將小鮮肉據為己有？誰又是食完女拍拍蘿柚，一身風流債等天收？他乾杯萬元靚酒，她冀望躋身上流，色情男女各有圖謀，轉眼又已天涼好箇秋。
