訪問劉江老師，當然係「講呢啲」！
他當年拍攝電視劇《拳王》，其中一幕的表情，被網友改圖，並配上字幕：「X！講呢啲！」令他在網上爆紅，多年來被瘋傳沿用。
「我特登睇返成套劇，根本就從來冇講過呢一句對白。」劉江看得雲淡風輕，「不過只要大家開心就得啦！」
生於1946年農曆8月的他，不愛斤斤計較，連身份證登記亦很隨意，「嗰個年頭冇乜中國人計西曆，所以我張身份證都係寫8月出世，冇乜所謂啦！」
他健談，語氣溫柔，聲線入咪，當然是配音的好材料，在1994年曾替向華強飾演《賭神2》的龍五配音，也是《藍江傳》的主角配音員。
「初初個配音領班同我講，話只係得幾句對白，點知去到，先至知道我係配藍江，喂！係主角嚟喎！咪由頭配到尾囉！」
劉江家有3弟1妹，童年時住在調景嶺木屋區，家境算是少少清貧，「唔係少少，係好清貧啊！」
作為大仔，他毅然參加了保送計劃，離鄉別井，孤身到台灣就讀京戲學校，有飯開有學返，減輕了屋企負擔。
一個人在異鄉難免寂寞，每次同學仔食飯，都會有父母預備豐盛的餸菜，更會拿在他面前得戚示威，令他不是味兒。
「唔開心嘅時候，我會爬上山頂，坐喺大石頭上面，望住山下面啲稻田，有時火車經過，火車上面嘅乘客，細粒到好似一粒塵咁，我就領悟到，煩惱咪一樣好似塵咁細，冇乜嘢係大不了。」
有時劉江會走到路軌旁，趁火車經過身邊時，出盡力大嗌「吖~吖~」，把所有愁煩抒發。
不過身體上的病患，不是嗌幾聲便能嗌走，還得好好保養。他33歲中過風，腦血管栓塞； 2015年又做過心臟「通波仔」手術，近5年開始跟周潤發跑山健身。
「發哥日日畀通告我，要我朝朝跟佢跑，仲問我點解唔叫埋老婆一齊跑。有一日，佢問我老婆鍾意食乜，我話西多士，佢就打包俾我老婆，咁樣食同唔食，兩公婆都要去跑啦。」
今年12月15日，是劉江和老婆結婚51周年紀念，談及相處之道，他分享說：「好似跳舞咁，你進一步，我咪退一步。我進，你就退囉！ （咁會唔會係你退晒？）最後當然係我退晒啦，幾硬淨都冇用，最後揸fit人都係佢，哈哈！」話雖如此，眼神卻流露柔情。
多年來婚姻可有亮過紅燈？「我屋企全部啲燈都係黃色，冇紅色喎！」此刻劉江的臉上，重現「講呢啲」的表情。
