劉蝦玲絕對是行走的衣架，如果要在香港電影金像獎頒獎典禮中，選出最佳衣着獎，我知道大家一定會話，唔係呀嘛！又係蝦玲姐拎？
但我覺得，蝦玲姐係值得拎，因為佢係（胸前）好偉大嘅演員，我相信其他演員付出$1000、$2000努力去買衫時，但蝦玲姐永遠會付出5萬蚊、10萬蚊去著靚啲，花盡心思令自己艷光四射，香港演藝界多謝有佢咁偉大、咁識著衫嘅演員。
我知道蝦玲姐實會好謙虛咁話：「千祈唔好咁講啊！唔係偉大呀！你話我著得好睇已經OK啦！」
叫得蝦玲姐，怎會浪得虛名？佢今年以一襲黑色露肩低胸長裙，配襯一條金Loong蝦頸鏈，搶盡眼球，睇見都流口水想開餐，你話芝士焗定上湯煮先至好味呢？
唔識嘢的你，一定以為蝦玲姐啱啱去完鯉魚門或者屯門三聖邨海鮮檔，先至趕去會場，你Sit down please啦！等我為你慢煮呢隻金Loong蝦吧！
蝦玲姐呢身打扮，唔係來自波士頓，係出自意大利百年品牌Schiaparelli的2024春夏系列，據官網顯示，售價是9,900歐元，即約82,000多港元。蝦玲姐相當有taste，見今年係Loong年，一於整隻金Loong蝦應吓節。
除了金色Loong蝦造型外，系列其實仲有金色蟹、木魚骨、海膽等海洋生物款式，任君選擇，設計天馬行空，前衛大膽。
有理由估計，下一季度的時裝系列，應該輪到金錢、葫蘆同雞出場啦，著去賭場一定大殺三方！
不如同你惡補一堂時裝課吧！Schiaparelli是藝術家Elsa Schiaparelli於1927年創立的同名時裝品牌，2019年由Daniel Roseberry接棒擔任創意總監，年輕的他頻頻打造出超現實怪𧩙作品，極具話題性。
Daniel試過創造出獅子頭禮服，也有金屬心肺頸鏈，他秉承「將熟悉的事物變陌生」的理念，打造一場場超越想像的時裝盛宴。
在時裝界，歷年來其實有不少以Loong蝦為創作靈感的服裝，早在1830年的歐洲，已有畫家將Loong蝦繪畫在女性的頭上，作為一頂帽子。
而西班牙著名超現實藝術家Dali，於1936年曾創作出Lobster Telephone。
2016年Lady Gaga參加格林美頒獎禮，就戴上英國帽子設計師Philip Treacy設計的Loong蝦眼罩。
咪以為香港唔鍾意Loong蝦喎，早在1991年，葉德嫻曾在電影《與龍共舞》中，穿上由「GGVGG」設計的Loong蝦晚裝，一早走在潮流尖端，令人笑破肚皮。
嘩啦啦，好一隻Loong蝦！令嘉玲姐變蝦玲姐，偉仔都變成「偉大」。
