Fashion這回事，你識條鐵嗎？

在《萬千星輝頒獎典禮2023》的行紅地氈環節，炎明熹穿起透薄紅絲襪襯Ruffle裙，上身白色墊膊長恤衫中門大開，露出黑色Bra Top，再加一條箍肚黑幼帶，襯托Barcode蔭的髮型，展露性感嫵媚的韻味。

網友們幾乎一面倒嘲笑她穿得像一隻紅鶴，更有鹹濕仔說聯想到夜場風情，或者紅磨坊艷舞，把口認真唔收。

到底她是否得罪了形象設計師，才會以這樣一身紅、白、黑色裝扮，成為全晚最嚴重的「時裝車禍」受害者呢？ 

嗱嗱嗱！都叫你不要成日沉迷打機，或者掛住撲上去山姆掃貨，得閒不妨抽時間增值自己，第日笑人都至少有根有據吖嘛！

你未必會知，炎明熹這身打扮，其實是格魯吉亞著名時裝設計師David Koma 的2023秋冬系列，單是那條紅色Ruffle裙，售價是$13,100。

「呢套衫唔係我設計，係一個品牌，成套三件頭，本身個黑Bra唔係咁，我自己加咗條帶，安全啲。」正於理工大學攻讀時裝設計課程的炎明熹表示，不擔心被指是「時裝車禍」，「有啲人覺得咁樣好靚，有啲人就覺得冇我以前咁好睇。嚟緊我會試多啲唔同嘅嘢，例如性感、優雅、可愛同成熟。」

芳齡十八，青春無敵，形象當然可以百變，但不妨聽一聽一些時裝界前輩的意見，讓自己的時裝路可以走得更順更鮮明。時裝設計師何國鉦（Dorian） 指炎明熹的可塑性好高，但今次的「紅鶴」造型，暴露了她兩個比較蝕底的地方：上圍不豐滿、大腿粗。

「佢條裙太短，露晒大腿，雖然着咗件衫，個Bra若隱若現，但都會見到係咪豐滿？試新嘢唔係唔好，大家睇到嘩嘩聲，但全部係唔好嘅『嘩』，只會俾人覺得刻意暴露。」

另一位大師鄧達智也大讚炎明熹樣靚夠高，歌又唱得好，「我好欣賞佢，但佢個形象冇可能搞成咁，好唔統一，暫時絕對唔適合用性感包裝，不能操之過急。無論係麥當娜或梅艷芳，佢哋都一定要經歷一啲嘢，先可以展現到箇中味道。佢（炎明熹）呢個時候係清純青春，個樣好乖，就算要型，都可以有好多種，唔一定要好loud好sexy。」

誰沒經歷過「時裝車禍」？被人笑得多，自然會學得更多。待羽翼漸豐，紅鶴自然能夠飛得更高更遠。