![](https://ew-plus-static.hkhl.hk/prod/image/2023/12/74865b3ea68c4fe8938749aebcad2218.jpg?x-oss-process=image/resize,w_720,m_lfit)
男人,可以有一時的窮,但不可以失去奮戰一生的鬥志,要做個真的漢子,成和敗努力嘗試,承擔起苦痛跟失意,像吳浩康。
去年初春3月,他與郭思琳奉子成婚,因疫情影響物流運輸,他要在山邊執拾樹枝,為婚禮的禮堂做佈置裝飾。
少少阻滯,當然無改他愛定一個人的決心,在婚禮上他百感交集,泣不成聲地說出愛的宣言:「多謝你願意嫁畀我,願意同我一齊去經歷我哋嘅人生,願意同我一齊去遮風擋雨。」
承諾,不是信口開河,是一世的承擔。除了要做一個好丈夫,今年踏入40歲,他更多了一個身份——好爸爸。
上月初剛離開效力了20年的英皇娛樂,吳浩康知道,要孭起一家三口的生活擔子,他不能停步,必須努力拼命掙錢。「個市太靜,齋靠教唱歌,僅僅夠開飯,但始終需要餘錢,等屋企有充足資源,唔需要依賴人。」
除了平日晚上開班教唱歌外,他日間還多了一份正職:做地盤工人。能夠放下歌手身段,日曬雨淋幹粗活,絕對不是易事。
打從今年兒子出世後,吳浩康未雨綢繆,馬上考「平安卡」(建造業安全訓練證明書),謀定出路。在這半年光景,他每天清晨6時出門口返工,乘坐港鐵再轉小巴,到淺水灣一個地盤負責搭建金屬棚架,朝8晚5,日薪約$1500。
「我搵多搵少,全部都俾晒屋企,都係為咗頭家。」試過有工友問他是不是吳浩康,他會大方承認,更得到對方鼓勵打氣。
「我發現有唔少地盤工友,都喺人生中曾經滄海。我相信香港唔止得我一個爸爸,會為家庭打拚付出勞力,大家一齊加油,捱過去吧!」
吳浩康有時懂得苦中作樂,在南區工地拍下日落美景,會自我安慰:「每日放工都係望住呢個景,令我可以喺繁複、無聊、刻板嘅工作後,抖番啖氣。」
能屈能伸的吳浩康,曾在訪問中說過:「我咁多年去不斷堅持努力,都只係想做一個合格嘅仔,我想做一個似樣嘅人。當我媽媽走咗之後,我知道所有嘅愛唔係理所當然,我要珍惜眼前人。」
曾經被喻為陳奕迅接班人的他,一度未紅先囂,糟蹋了不少機會。「以前的我真係幾臭串。」歲月這把殺豬刀,將他逐漸琢磨成一個合格的丈夫和爸爸。「現在我已經變得謙卑。」
戴上安全帽的吳浩康,已蛻變成一個抬得起頭的真漢子。