在我細個時，當時國家債券已經唔值錢，有不少同學屋企都損失慘重，但我們斗零都冇買，於是問家母我們是否不愛國？家母話正因為愛國才唔會買，否則，當債券到期日不能兌現，如果走去抗議，一定會被人話唔愛國，而債券是一張由債仔寫畀債主的欠單，國家是債仔，還款的機會是相當渺茫，所以，唔買就是最好決定。
在上星期《施政報告》發布當日，有傳聞大銀行向大孖沙追投資貸款不果，而將所抵押物業賣畀外國基金，有YouTuber計數，大孖沙用物業向銀行做按揭貸款，最多只能借四成，銀行借多三成投資貸款，現在商業樓宇平均下跌四成，銀行貸款已經入肉，大孖沙冇錢還，而香港已經冇人有能力買咁大額物業，銀行唯有將所按物業賣畀外國投資者，不足之數再向大孖沙追討。
YouTuber講到似層層，有理有據，但有一個問題，大孖沙所借的三成投資貸款，究竟去咗邊？如果買股票， 起碼賺三成， 買金賺兩成，買比特幣更加唔使講，賺的以倍數計，就算唔賺，甚至蝕多少，都唔會無緣無故消失。現在是投資貸款清零，銀行才要將抵押物業賣畀外國基金。
幾年前有銀行家同我講，我一毫子都唔使出，每月淨袋五百萬，嚇到我由張櫈跌咗落地，試問世界上邊度有咁大隻蛤乸隨街跳？銀行家話，用我們的物業做擔保，可以借十億元投資貸款，年利率2%，用嚟買債券，基本可以收取8 %年息， 淨賺六千萬，平均每月五百萬，真係好過搶。我始終冇買，因為我記得，債券是一張由債仔寫畀債主的欠單，如果債仔唔還錢，債券持有人是沒有任何辦法，於是我多謝銀行家好意，至於我點樣講，真的是商業秘密，不過我並沒有話債券是一張由債仔寫畀債主的欠單。
我認為銀行到了今日才向客戶追收投資貸款，已經是有情有義，不少按揭貸款的物業如果包括投資貸款已經是資不抵債，不過亦不會差太多，壞帳亦不會太多，在出售投資貸款所抵押的資產之後，銀行的不良貸款就會大幅下降，當清理大部分投資貸款之後，樓市的反彈周期就會開始，不過，最快都要兩三年，這兩年樓市會平穩發展，冇必要的話唔需要賣走自用物業。
樓市反彈要有一個先決條件，就是要提高按揭上限，由四成升至六成，但未解決投資貸款之前，金管局是不會放寬逆周期措施，因為咁樣做人會令銀行放貸更多，風險更大，所以，要樓價上升，一定先要解決投資貸款。
