香港喺六、七十年代係玩具製造業中心，好多當時得令嘅玩具都係香港製造。到八、九十年代經濟起飛，日本動漫深受歡迎，形成流行文化，衍生出超合金機械人、搪瓷車等玩具，實際上係今日IP產品始祖。我當年屋企買唔起超合金玩具，到後來可以負擔得起已經過咗買玩具嘅年齡。不過好多成年人到今日都好迷呢類懷舊玩具，二手買賣價分分鐘成千上萬蚊，舊時玩具成為收藏品。
谷子經濟之能夠橫掃全球，所賣嘅唔單止係商品本身，更係一種情緒價值。
今日嘅「谷子經濟」（goods economy）都可以話係當年超合金熱潮嘅延續，但玩法更加層出不窮。所謂「谷子」係「goods」譯音，係IP所衍生嘅周邊商品，如動漫、電玩、盲盒等，根據IP來源，可分為國谷（中國）、日谷（日本），唔少大熱角色公仔引發搶購熱潮，帶動一眾「食谷股」受熱捧。
講到近期吸金王，本港代表Labubu平地一聲雷，憑藉九顆尖牙、圓圓大眼、尖尖耳朵，令全球粉絲為之瘋狂，通宵排隊搶購，部分限量版由原價一百元（港元，下同）炒至幾千元一隻。上年我同屋企人去澳洲，孫女話要去Pop Mart買Labubu，陪佢排咗成個鐘，點知心儀嗰款無貨，退而求其次買咗一堆盲盒，結果孫女居然話無隻啱心水。粉絲密密科水，母公司泡泡瑪特（9992）自然如魚得水，帶動去年全年純利飆升近一點九倍，創始人王寧身家暴漲逾千億元，搖身成為河南新首富。
谷子陣營另一支柱Chiikawa幾年前喺日本橫空出世，角色同樣風靡全球。名創優品（9896）上年成功獲取Chiikawa IP授權，喺內地推出多間快閃店，發售多款限定品。兩個月前終於殺入香港開設官方限定店，吸引過千粉絲通宵排隊搶購心頭好。睇返公司業績，上年全年收入約一百七十億元人民幣，按年增兩成二，創下年度收入新高，吸金力都唔弱。不過兩者股價表現卻各有不同，未必每隻「食谷股」都能完全受惠於谷子經濟。
谷子經濟之能夠橫掃全球，所賣嘅唔單止係商品本身，更係一種情緒價值，令消費者產生情感寄託同身份認同。有臨床心理學家指，以往卡通風格多數可愛、童趣，但最近火紅嘅公仔造型奇特，背後往往帶出做人或生活訊息，有療癒性質。另外，熱門IP通常會推出盲盒同限量版，提高產品稀有性，從而激發消費者嘅購買慾望，令人抽開有條癮。
雖然近年中國整體消費降級，但谷子經濟卻逆市走強，根據艾媒諮詢數據，去年中國谷子經濟市場規模為一千六百億元人民幣，預計到二○二九年將激增至超過三千億元人民幣。至於香港，政府未來五年計劃支持超過三十個文化IP項目，財政司司長陳茂波亦表示IP產品商機大，香港品牌大有作為，有望喺全球市場越過高山越過谷，創出新天。
