唔使幾耐，《財政預算案》又出台，今次如無意外，財赤大約有一千億，不過，政府一向都是大喊十，大大聲講話有千億財赤，叫大家畀下意見點樣解決，但公布之後，我估計財赤大約有八百億，其實，一啲都唔難解決。
既然政府出到聲，立刻有不少人發表意見，很多人唔知道，香港人有魚蛋論精神，並不是希望自己可以攞到多少着數，而是希望現在攞着數的人唔可以繼續攞。首先是要求公務員減薪、降薪，其次是取消二元乘車優惠，就算政府聽隨民意，搞到咁大件事，每年亦只不過慳到二三十億，細眉細眼，相比千億財赤，根本沒有作用，政府要解決問題就要考慮開源，而且要開水源充足的源頭。
千億財赤如果放在其他發達國家，簡直是小事一件，如果唔推出銷售稅就發債，只要不超過100% GDP，國際評級都會視之為安全水平，但香港人唔接受，唯有另找源頭。
如果唔係樓市低迷，成交量偏低，解決千億財赤只是彈指之間的事，只要賣多幾幅地就可以，但現在新樓銷情不佳，地產商冇興趣買地，冇賣地收入，政府又如何解決財赤問題。
冇人買地，可以賣樓，而且是再賣已經賣咗嘅樓。我不是故弄玄虛，就是那些早已賣走的居屋，現在的居屋業主，有不少仍未補地價，如果他們仍然居住在自己的單位是沒有問題，擁有私人住宅也可以，但唔能夠出租，而事實上不少居屋業主是擁有私人物業，居屋是用作存放雜物，當然亦有不少業主偷偷地將居屋單位出租，或者租畀自己友。其實，居屋業主亦知道，出租居屋單位是很麻煩，租客唔交租都唔知點追，所以，不少居屋單位是空置，現在租務市場暢旺，將單位空置是對自己唔住。
有人話，近日銀行都不願意借錢畀人買樓，更何況是補地價？居屋業主就算有心都冇力。
這個問題容易解決，政府最鍾意做擔保，疫情的時候擔保不少中小企問銀行借錢，現在最低限度有兩成半冇錢還，官員眉頭都冇皺一下，大筆一揮，由庫房孭了條數。但借錢畀居屋業主補地價是不同，甚至是左袋入右袋，就算居屋業主唔還錢，政府可以收返層樓拍賣，一定唔需要撇帳，何樂而不為。
我初出道時，前輩教落，生意淡薄，不如賭博，賭博的意思不是賭，而是博。既然地產商唔買地，政府不如博一博，協助居屋業主問銀行借錢補地價，政府做擔保，如果想更加有效，不妨打個八折，現在居屋未補地價的金額大約六千億，打八折都有四千八百億，足夠政府應付五年財赤，唔通五年後都冇地產商買地，係就冇得救。
