上星期我要在銀行家俱樂部做一場很輕鬆小型演講，主題任我決定，不過，主辦機構希望我可以講吓北京、上海、香港三地比較，其實是很困難，老實說，大家都知道北京是政治中心，上海是金融中心，香港究竟是甚麼，現在有人話香港是執笠之都。

很多人不明白，香港擁有的優勢，在內地不少城市亦擁有，而且更好，例如近日有不少香港人北上消費，原因是深圳以及大灣區提供更優質產品及服務，又平又靚，但點解咁多內地人仍然希望來港，甚至攞埋香港身份證做香港人？

正當我沉思的時候，秘書問我下月初去新加坡訂頭等艙抑或商務艙？我話生意難做，唔好咁奢侈，商務艙便可以，而事實上我係唔鍾意坐頭等艙，很多人唔知道頭等艙與商務艙分別，設備上頭等艙當然高級很多，但主要是私穩，一般人睇唔到頭等艙乘客，所以，不少有錢佬帶二奶三奶去旅行，一定坐頭等艙，這亦是我唔坐頭等艙原因，否則，見到面都唔知打唔打招呼。

如果鍾意有一些優越感，坐商務艙比頭等艙更佳，因為在上機時，商務艙比經濟客位先行，當商務艙的客人坐定定，經濟客位的人開始上機，如果認識的話，大家打個招呼，大家話坐商務艙是不會很有優越感。

我有不少內地老友，在香港不但置有自住單位、家族辦公室，甚至子女在香港讀中學或者大學。

我問內地老友點解要在香港買樓，大多數都會話如果唔買，在一班老友或者生意朋友當中會好冇面，買了樓之後，可以與唔同城市工作的老友相約在香港見面、食飯，所以，一般人均消費超過千元的餐廳是經常爆滿，馬會以及半島日本餐廳，可能要等幾個月才有位。在上海，人均超過五百元人民幣的餐廳已經執了一半，所以，我明白點解叫香港做執笠之都。

其實，我自己經常都搞家宴招呼內地老友，老友話，如果我在廣州深圳搞家宴，他們又未必會嚟。

雖然我話香港是中國人的商務艙，但亦有頭等艙特質，如果去新加坡，導遊會帶旅客去睇吓邊間屋係李連杰住，邊間屋是馬雲住，在香港你根本唔知道內地猛人住在哪裏，香港人亦唔想知道，就算大家一齊在茶餐廳飲咖啡都冇問題，就算大家聽到范冰冰以六十五萬租一間屋，都會話唔係好貴，一啲都不會驚奇。

商務艙有一個特質，就是坐過之後很難返轉頭坐經濟客位，香港也是一樣，在香港住過一段時間之後，返回自己的原居地很難習慣，甚至變得很陌生。