香港人今年在投資方面，可以算是頭頭碰着黑，恒指不但比高峰時下跌了接近一半，甚至輸埋畀台灣加權指數；債券本來被公認是非常安全，但不少買債券的人最後要賣樓還債，輸幾多就唔敢講，影響所及，樓價亦比高峰時下跌了兩成，在樓價來說，其實已經是很多，不少以高成數按揭買樓的業主已經變成負資產者。有時唔明白香港政府點諗，明知初次置業者的實力唔夠，仲容許他們做九成按揭，現在那些業主變成負資產，唔知道政府官員有冇內疚。

無可否認，咁多種投資工具，最危險應該是虛幣，不過買虛幣的人就算輸咗都唔能夠怪人，因為講到明是虛。不過，現在是虛則實之階段，唔知幾時又會變成實則虛之。

有不少人問我虛幣有甚麼危險？我都唔識得答，本來我打算參加一些講座，聽吓一些少年專家的意見，但幾次申請都被人拒絕，主辦機構以為我去踢館，仲話大家都係搵食，使唔使做到咁絕。我相信主辦機構誤會了，我真的是希望了解一下虛幣玩法以及其危險性。

既然冇人受我玩，我唯有無師自通，一於深入虎穴，幾個月前，在比特幣大約每個兩萬至兩萬二千時買了一百個，亦早有做柳毅的準備，柳毅準備甚麼，就是全輸（傳書）。

我個人一早認定，虛幣隨時會清零，輸錢唔緊要，但要堅守一個原則，就是唔好教人投資虛幣，否則有機會好似JPEX班投資者，又輸錢，又惹上官非。唔講大家未必知道，有六十幾個JPEX的投資者被警方拘捕，他們當然話自己是受害者，究竟是騙徒抑或是受害者，相信很快就會有一個答案。所以，如果唔想惹上官非，一定要做一個孤獨投資者。

我買了一百個比特幣之後，美國開始暴力加息，絕大多數人都受到影響，持有大量物業的收租佬更加損失慘重。但我發覺，如果將比特幣賣走，將總數做定存，每月應該有不錯的利息收入，於是在三萬六美元的時候，將一百個比特幣賣走，得到二千八百萬港元，全部做晒定期，收取百分之五年利率，每月大約有十一萬港元利息收入。

當我做完定存之後，我才發覺虛幣的天敵原來是定存，一般人會認為，如果定存只有百分之零點一，當然要買一些投資產品，否則輸通脹都輸死；如果有百分之五年利率又唔同講法，莫講話冇利息收入的虛幣，就算高息債券都唔會投資。

換句話說，高息定存不單止是虛幣的天敵，而是各種投資產品的天敵，所以我認為高息不會持續太久，否則所有投資產品都沒有市場，那些金融才俊又何以維生？不過又很奇怪，我在三萬六美元賣走比特幣之後，近日竟然升到三萬八，唔通比特幣的天敵是天下無敵。