近年在港興起源自日本的小顏術，其最大好處是在非入侵性情況下，徒手就可做到瘦面、提升蘋果肌和消除黑眼圈等美顏效果。網上有指小顏術做一次見效，究竟有冇咁犀利？今期本刊派出記者Twiggy，搵小顏術師MayMay親身測試。
       一直受包包面困擾的Twiggy，做完1次45分鐘療程後發現即時見效，她直言不敢相信：「塊面真係尖咗，而且冇咁大細面。」

節食治標不治本

        身高169cm的Twiggy，由於愈大愈鍾意食嘢，近年自覺身形圓潤了，包包面亦跟住出現，她笑言：「塊面係我最注重嘅，因為出街識朋友，第一眼就會睇你塊面，就算我身形幾好，啲人一望到塊面，都會覺得我肥。」為了改善情況，她曾以一日食一餐去減肥，希望達至修身兼瘦面的效果。不過節食始終是治標不治本的方法，之後一食番多啲嘢，體重便即時反彈。

比例過長大細面

       本刊安排Twiggy搵李日朗的師傅、兼好多名人如黎芷珊、戴祖儀等都幫襯過的小顏術師MayMay一試瘦面效果。MayMay初步檢視過Twiggy的面形後說：「以面形比例嚟計算，佢塊面係過長，左右有啲唔平衡，但問題唔算嚴重，用手法去干預，係可以幫到，例如幫佢按咀嚼肌同提升番蘋果肌，應該可以增加番面部嘅立體感。」

推按提升蘋果肌

       MayMay分析過後，正式開始進行療程。她首先幫Twiggy鬆弛頭部，她稱因為頭皮和面皮都是同一塊皮，頭皮繃緊的話，整塊面都會下垂，而放鬆頭部也有助睡眠質素。

       由於Twiggy的問題主要是面部過長和左右不平衡，所以MayMay集中在她面部不同部位用手法去按，例如按摩咀嚼肌去水腫，令輪廓更立體；亦有提升蘋果肌動作，以將面部肌肉結節打散，有助將面形縮短；還有由上而下搣頸來減雙下巴，之後再輕按眼周減退黑眼圈，及額頭弧度矯正等，不斷通過細節位置去郁動肌肉，而每個動作大約維持2分鐘左右。MayMay另外發現Twiggy還有少少「寒背」，故也有幫她做提高雙手向後拉的動作。

效果滿意但好痛

       整個療程大約進行了45分鐘，Twiggy表示做完後照鏡也嚇了一跳，「開頭有啲唔信，因為我最初唔知小顏術係咩嚟，但一做完覺得塊面真係尖咗，而且冇咁大細面，效果都幾明顯。」

       Twiggy不諱言，成個過程都算舒服：「按個頭最舒服，但有幾Part都幾痛，好似由上至下搣我條頸，仲有按嘴邊啲肉同眼周時都係好痛。」而MayMay話這是正常反應，並建議Twiggy大約2至3星期進行一次療程，基本上做6次就可達至一個比較理想的效果。

手法精準保安全

        問MayMay是否做完6次療程後，瘦面效果就可以持續永久？她續說：「唔可以用永久去定義，因為人係有活動同唔同嘅生活習慣，仲有大環境同地心引力等問題，都會對療程效果有影響。」她舉例說，睡眠時打側睡，又或者經常用手托面等，都有機會造成大細面。

        最近曾有內地報道，指有人按摩時頸部錯位，引發腦部梗塞致死，MayMay強調：「小顏術手法適合每一個人，加上是非入侵性，絕對安全；而每個人去操作手法時，都務必要精準同謹慎。」

群星追捧

        MayMay當小顏術師8年，幫過很多名人、藝人進行療程，例如黎芷珊、黃智雯、戴祖儀、蔣怡、宋芝齡、陸浩明、李彩華、龔慈恩和女兒林愷鈴，以及區永權夫婦等等。而李日朗也曾是她的學生，之後到日本進修後成為小顏術師。原來要成為小顏術師，根據MayMay所講，只要跟一個曾進修過小顏術的人上相關的課堂，直至對方覺得你的技術到家，便可以成為小顏術導師了。

胡渭康：做足6次

       近年小顏術大受名人追捧，藝人胡渭康也是追隨者，且還做了6次。記者致電問他為何會做小顏術療程，他直言：「因為李日朗話小顏術可以令到我嘅容貌輪廓，更加立體同埋精緻，所以我放心交畀佢做，亦得到好好嘅效果。而過程中並無任何不適感覺，甚至乎舒服到瞓着咗。」他表示，會推介給對容貌有要求的朋友。

甚麼是小顏術？

        小顏術是以自然療法的技術作重塑，塑造面部立體輪廓，主要是用手法去矯正及塑造面部五官，手法可達到臉部7個層次：表皮層、真皮層、脂肪層、肌肉層、筋膜層、骨膜層和骨骼層。完成療程後，可增進面部底層更健康，從而達至抗衰老效果。

       當有需要時，全塊面都要做手法矯正，小顏術師會因應客人不同面形問題作靈活處理。第1次完成療程後，一般已可睇到改變；基本6次左右便會達至比較理想的狀態，小顏術師會因應個別情況而增加次數。