發佈時間：18:20 2024-01-16
無綫藝員楊證樺（Man）近年除了忙於拍劇，也與友人合資搞生意。今日（16日）他有份投資的飄眉霧眉店「韓綉美」第4間分店於荃灣開幕，太太沈可欣也有到場支持。問阿沈有否試過公司的飄眉霧眉服務時，她坦言為了迎合不同角色留用普通眉形最好；但懶於護膚的她卻有為老公試公司新出的面膜，更表示一敷已見效，原來阿Man為了自家品牌面膜試足半年才成功。
面膜一敷已見效
阿沈笑言一向唔貪靚，但為了拍劇需要，護膚程序如搽爽膚水、精華和面霜都會做到足，但甚少敷面膜和做Facial。直至老公一年前接觸這門生意後，有意發大嚟搞，踏入2024年，除了開新店，還推出護膚產品，打頭陣是面膜，Man坦言：「玻色因放喺Cream就多，放喺面膜真係好少。」所以他搵製造廠不斷試合適的Formula，成功後就搵太太阿沈去試。阿沈坦言：「一敷已經見效，所以我𠵱家日日都敷。」
食得清淡多飲水
問阿沈有遇過嚴重的皮膚問題嗎？她稱：「我生第一個仔時下爬生咗我一世人嘅暗瘡，仲要好大粒，嗰時只係每日做好清潔等佢慢慢凋謝，因為陀住BB都唔敢搽任何嘢。」至現時她盡量少吃煎炸嘢，亦會多飲水，她強調：「我一日起碼飲2公升水，食嘢亦唔會過量，最鍾意食清淡食物如蒸魚和炒菜等。」所以每次兒子要求食麥記，她等老公陪兒子吃，她寧願去食麵。
陪仔放電當Keep Fit
相反，阿Man喜歡食煎炸嘢，更是無辣不歡，他笑言臨瞓前必定食個辣公仔麵先瞓得着。雖擁有高佻鋼條身形，卻不愛做運動，阿沈笑言：「但佢成日陪兩個仔踢波同踩單車放電，成日做嘢周圍走唔停㗎！」阿Man接着說：「本身仲有做緊寵物同網站生意，嚟緊仲想開多間飄眉霧眉店，因為想轉型做美容院同推出自家護膚品牌，跟住開拓埋大灣區嘅巿場。」他辛苦搵錢都係為頭家，問阿沈點慰勞老公時，她甜笑說：「煮個超辣公仔麵畀佢食。」雖然阿Man也不愛護膚，但平日開工拍劇拒絕化妝都算是護膚心得之一。
