發佈時間：16:04 2023-12-26
半年前移民英國的林雅詩（Grace），最近回流香港出席活動，見她清減不少，原來是因為她獲香港攝影家工作室邀請擔任模特兒，所以回港前特地在英國跑步和戒可樂甜品瘦身減磅。為了令皮膚白滑更上鏡，她還勤敷mask、多飲湯水和每星期用牛奶浸浴，她笑言：「做女人真係唔可以懶㗎！」
跑步修身
Grace由細到大都想做Model的工作，之前亦曾接過類似的產品攝影活動，而今次係因為影車雜誌時聯繫到香港攝影家工作室，對方竟然邀請她擔任模特兒，所以她二話不說便答應。為了以最佳狀態示人，活動前一個月她特地在英國跑步，她坦言：「其實之前我一個禮拜跑兩至三次，但因為英國天氣唔穩定，不時落雨、落雪又好凍，所以有時會去健身室跑，每次跑一個鐘，臨瞓前仲會喺床上做空中踩單車30次嚟收緊腹部。」
戒食甜嘢
運動都係其次，Grace最大問題係鍾意食甜嘢，她笑言：「我實在太為食喇，正餐每日可以食一餐，但甜嘢真係戒唔到，最鍾意就係飲可樂，每日閒閒哋飲一至兩罐，又鍾意食蛋糕、朱古力同曲奇餅。」她無甜不歡，所以要修身，一定要戒食甜嘢，她續稱：「想瘦番早上要飲果汁或青汁，中午唔食，晚餐食少油清淡嘅菜式，更加要少食澱粉質，通常夜晚六點前食完就可以捱到第二日。」
牛奶浸浴
至於護膚心得，由於英國天氣乾燥，好易令她的皮膚甩皮和出現紅點、細紋，所以她每晚均要做好護膚程序包括用神仙水、搽精華和保濕cream，仲要敷mask。為咗令全身皮膚更滑，她每個星期仲會用牛奶浸浴一次，她笑言：「因為英國買牛奶比較平，大約用三公升，再加牛奶粉去開牛奶浴。」她亦會每天飲8杯水和多飲湯水去滋潤皮膚，例如花膠響螺煲雞、花旗參或鹿茸燉雞湯、蕃茄薯仔雜菜湯或燉蘋果等。
單腳影相
拍攝當日，Grace以不同造型上陣，由OL打扮、宮廷服、旗袍Look至高貴晚裝都有；由於攝影師常要求Grace擺出多個不同的姿勢，她表示最難是着住高踭鞋單腳企影相。而多個打扮中，她最鍾意是OL打扮和黃色晚裝，顯得她高貴又大方。問她今次會留港多久？她續說：「應該會長時間留喺香港，希望可以做多啲唔同類型嘅工作，搵到適合自己嘅路，做一個自強嘅女人！」
