美魔女，近年跟女神一詞一樣，躲不過被濫用的厄運。

論名副其實，級數又位處頂端，53歲的日本元祖級女神酒井法子，上屬的兩個名詞，當之無愧。

那些年的日劇《同一屋簷下》、《等你說愛我》（星之金幣）；單曲〈碧綠色的兔子〉、〈鏡中的禮服〉⋯⋯佔據了亞洲多少人的黃金年代？

當時的少男少女，跟酒井法子一樣，現已是熟男熟女，所以不難看到，女神於上周訪港3天，宣傳其7月舉行的演唱會，接機的のりピー族（Nori-P族，其粉絲名），不乏拖男帶女人士。

「真係好感動！雖然喺日本都有唔少爸爸、媽媽，會帶埋小朋友去追星，但係香港嘅粉絲都好熱情，我冇諗過會有咁多人去接我機！」

現場所見，零膠味的美魔女，不論外形還是甫士，也是滿滿的時間停頓味道，舉手投足也令人懷疑，老的只有我一個。不只是談及長情的粉絲，酒井法子於接受《東周刊》訪問時，笑容滿面，當得悉被稱為「怪物級美魔女」時，她還表現出少女的腼腆。

「哈哈！我每日都好努力奮鬥㗎！飲食要均衡，運動更加唔可以懶惰！唔使工作嘅話，我仲會經常去旅行。好似今次嚟香港，雖然只係逗留3日，但其實我好想留1個月㗎！」

當美魔女不難，但要像酒井法子般，盛載跨代的回憶，大概真的要靠魔法吧。

加場顯魅力

事隔5年，當酒井法子宣布於香港舉行演唱會，旋即成為港、台熱話，甚至她是次訪港，也被大規模報道。

接受《東周刊》訪問時，為她佩戴收音咪遇上小意外，見慣大場面的女神，不但處變不驚，還大晒廣東話，淡定一句：「冇問題！」，搞掂！

「唔經唔覺就闊別咗香港5年，我好期待同粉絲嘅會面。上次喺香港開演唱會嘅時候，現場嘅粉絲拎住好多燈牌，令我留下好珍貴嘅回憶。𠵱家連疫情都過咗，令我更加想快啲面對面見番啲粉絲。」

畢竟是亞洲元祖級Idol，酒井法子的演唱會，因粉絲的威力而火速加場，足見其魅力已凌駕於歲月的流逝。

「上次的演唱會叫《Miss You》，今次就係《My Dear》，同樣都係想同我嘅粉絲，製造更多共同回憶。」

無國界女神

這趟演唱會，未舉行已展現了酒井法子長青的魅力，除香港之旅的「接機服務」以外，甚至有過百粉絲於其下榻的酒店等候；即使是日本粉絲，表示想來港一睹偶像本尊的，也大有人在。

「哈哈！我好多謝佢哋！我覺得好幸運，一直以來都有佢哋嘅支持。」

不經不覺，酒井法子已入行近38年，「係，時間真係無聲無息咁流逝，但係我係向前看嘅人，所以會繼續努力，奸爸爹！」

粉絲無地域界限，但說到最忠實的一員，則非酒井法子的兒子、快25歲的祐樹莫屬。

「佢都有睇過我嘅演唱會，話最鍾意〈一滴眼淚〉呢首歌，仲讚媽咪好有型，哈哈！

「我同佢去歐洲旅行嘅時候，可能亞洲人望落去比較後生，所以就經常被誤認為姊弟或者情侶，我聽到好開心㗎。」

玄米凍齡法

各地粉絲長情，也驚嘆酒井法子外形凍齡，由少女到熟女，到現在的「怪物級美魔女」，並非全因上天眷顧，她的恆心與自律，功不可沒。

「我之前講嘅飲食同運動，一定要自律！我好早就瞓，然後會朝早5點起身，做瑜伽、舉啞鈴，仲有上舞蹈課程⋯⋯最初只係想瘦身而做運動，開始咗之後發現，除咗身形健康，我嘅內在都一樣，於是就養成習慣。

「飲食方面，我會Keep住補充水分，仲有食有機同零化學成分嘅食物，魚、肉、蔬菜，一定要均衡。另外，我會食玄米，因為玄米比白米有更多維他命同食物纖維，又少啲醣分。」
持之以恆的自律，令酒井法子的意志更堅定，「如果唔去做嘅話，就一定冇可能，所以咁樣鍛煉，我係好開心嘅。」

不過，有些事還是不可以，問她可有人生的心願清單時，她說：「我暫時仲未思考過心願清單嘅內容，你（記者）有咩心願清單？俾我參考吓。」

當酒井法子一聽是Bungee jump時，即笑稱：「仲有Sky diving！（記者：「一齊跳吖！」）No！我畏高！哈哈！」

語言界限這東西，奇妙在會適時消失。

Kawaii！

以此訪問為例，《東周刊》採訪團隊一行3人，懂日文的人數為零，訪問進行時需依靠大會翻譯。到訪問完結的集郵環節時，英文跟日文單字，足以把我們與酒井法子之間的距離，縮至零。

記者見酒井法子這趟香港之旅，毫不吝嗇經常「派心」，於是增添其派心HP值，告知她最新的「貓咪嗚嗚」Pose（右手食指篤面頰，左手於面頰旁擺心心手勢）。

Idol內功深厚的酒井法子，秒速吸收並笑指：「Kawaii！Trendy！」隨即着助手拍低新Pose。

當集郵人士換上《東周刊》兩位壯男攝影師時，初時含蓄的B同事，被兒時女神甜笑誠邀同扮「貓咪」，附帶四目交投的一句：「Kawaii！」瞬間融化！

為保護同事，本文僅附上酒井法子的進化「貓咪」模樣。

而瞬間消失的語言界限，除了多得Body language，還有萬能的「Kawaii！」。