J2節目《不正常愛情研究所》的主持文頌男（Koba），去年年底確診罹患罕見的尤文氏肉瘤（Ewing's Sarcoma），立刻全面停工，接受治療。茫茫未來，文頌男勇敢面對，在社交平台分享抗病日常，排山倒海的留言及慰問，成為支持他的力量。可是，有個別網民太肉緊，因得不到文頌男的私訊回覆，感到不滿及出言斥責，令已飽受痛楚的文頌男，加添不少壓力。

文頌男雖已完成5次化療，但腫瘤不單沒縮小，反而變大至6厘米，現在改為接受電療。面對病情反覆無常，文頌男未有放棄，繼續分享抗癌路上的心情，放送正能量，本周四（2日） 接受東周刊副社長黃庭桄直播訪問，深情剖白。

化療失敗

文頌男說，在去年大約3月、4月，開始感到有少許腰痛，以為只是勞累所致，後來痛楚加劇，向脊醫求診，照X光後未有任何特別發現：「脊醫當時仲話我條骨好靚，睇我嘅徵狀，話係坐骨神經痛，所以當咗係坐骨神經痛咁醫，醫咗2個月。」由於疼痛難忍，文頌男向公立醫院的骨科求醫「排街症」，但需排隊一年，最後聽從朋友建議，到深圳的港大醫院求診，經詳細檢查後，確診患有惡疾，得了尤文氏肉瘤。

現在於香港接受治療的文頌男，經5次化療後，腫瘤未有變細，改為要接受28次的電療。訪問當天的早上，文頌男進行第15次的電療。「做到第三個星期，好似冇咁痛，係舒緩咗啲。電療嘅副作用，係視乎喺邊個部位進行電療，醫生話可能我會腹瀉，但暫時我未有呢個情況。暫時主要嘅副作用，係皮膚乾啲。」

搭的士要跪

今日的文頌男，病魔雖未有崩潰其堅毅心志，但已明顯影響其行動力，椎間靠近盆骨的腫瘤，因為壓迫著神經，導致行動不便。「行路時重心唔穩，需要用拐杖或者要人扶住。行路方式都唔同咗，做唔到趷高、跑唔到，行起上嚟會奇奇怪怪。另一個影響，係排洩困難，要好用力先可以大小便。」

直播訪問是在文頌男的家中進行，在接近一小時的訪問中，文頌男是一直保持跪坐姿勢，雙手靠着前方的坐墊來支撐。「因為腫瘤喺我盆骨附近，令我坐一陣就會痛，又或只可以坐比較軟嘅地方，所以我主要跪喺度，比較舒服啲。已經慣咗，半坐半跪呢個姿勢，係近來舒服啲先做到。好似做平板支撐咁，手臂撐住前面，後面趷起。Hold到攰，就直接趴喺度。」文頌男說。

文頌男解釋跪坐原因時，一直是保持微笑，彷彿只是說着別人的故事。無論是坐是卧，與生俱來的自然本能，我們從來不認為有什麼特別，但在文頌男身上，才驚覺原來能坐能卧，如此簡單的動作，其實是一種幸福。

坐都有困難，所以每次由屯門的家出發，長途跋涉的去瑪麗醫院，也未能乘搭最便宜及基本的交通工具：巴士。「基本上係坐唔到公共交通工具，企又企唔得耐，又驚會跌低，坐又坐唔到，所以一定要Call的士。搭的士時都係坐唔到，係要跪喺地下，用枕頭墊住，雙臂靠前支撐。我係綁唔到安全帶，所以有啲司機好好，揸得穩啲，否則我會左右郁來郁去。」

沒有購買醫療保險的文頌男，想節儉一點也不能，單是交通費，根本慳不了。坐的士來往住所和醫院，甚至一日內要到多個地方治療，每次交通費最少六、七百元，動輒更超過一千元。

父親漠視拒援助

去年10月停工至今，一直是靠個人積蓄及家人有限的幫助下度日，花了1元就是沒有了1元，在完全零收入的情況下，面對龐大的治療費用，着實驚心動魄。大眾的善心捐款，是對文頌男最強而有力的幫助。他公開的銀行戶口資料中，姓氏是陳，他解釋「文頌男」是其藝名，本名是陳文男，並說非因父親的關係而刻意改名。

文頌男12歲時，父親為了暗交3年的菲律賓情婦，離家出走，拋妻棄子。頓失經濟支柱，母親要打工賺取微薄的收入，缺乏照顧的文頌男，中三時更輟學變街童，做「外賣仔」維生。年少無知，怎會懂得處理家境巨變？他曾被誘導作奸犯科，包括吸毒及做小偷，幸好因膽小而未敢越軌，後來更發憤圖強，深懂「知識改變命運」，最後以優異成績考入教育大學，取得藝術管理及藝術教育雙學士資格。

失去了父愛，大好家庭支離破碎，文頌男承認是人生的遺憾。「我渴望有正常嘅童年，如果有正常嘅童年，我會唔會過得更好？我成日都會咁諗。爸爸消失咗好多年，係近年透過社交媒體搵我同家姐，我一直都冇理佢，直到我有病之後，有一次我抱住仇恨嘅心態搵佢，我已經有一個好大嘅劫難，睇吓佢到底點樣回應。」

「當時我inbox爸爸問：『我有癌症，可唔可以畀錢我醫病？』我見佢睇咗呢個訊息，但係佢冇回覆我。我覺得你平時不斷搵我，到我真係有難時，睇完都唔覆。」文頌男說。

媽媽，我愛你！

不怕！還有母親和姐姐。家人求神庇佑，更為文頌男在黃大仙廟求得一支上上籤，母親辛苦了大半世，省吃儉用而儲下、本計劃用作安享晚年的退休金，現在全部變為文頌男的治療費。文頌男說：「本身媽媽打兩份工，佢辭咗日頭嗰份，因為想照顧我、煮飯畀我食，媽媽犧牲咗好多。自從有病之後，我嘅想法改變好多，真係要活在當下，有咩想做想講，就即刻做，我依家成日同媽媽講：『辛苦晒！我愛你！』畀個擁抱佢，以前係唔會做，因為覺得尷尬。」

Stephy：約你唱《他不准我哭》

人人心目中都有一位完美女神，鄧麗欣（Stephy）是文頌男一直欣賞及喜愛的偶像，她的歌曲和電影，陪伴他成長，溫柔了跌宕起伏的歲月。在直播期間，副社長黃庭桄給文頌男送上一份禮物，就是安排Stephy和文頌男隔空對話，令文頌男驚喜萬分，笑不攏嘴。

本身出席活動中的Stephy，特意抽空給文頌男一通電話，她一句：「你好呀！」文頌男即時甜入心，怕醜仔上身，掩眼又掩面。文頌男和Stephy對話時，「紅都面晒」的說：「雖然你唔識我，我由細到大都聽你嘅歌，我最鍾意係《藍鞋子》、《他不准我哭》、《活到美麗》。」Stephy甫聽《活到美麗》這歌名時，即說：「呢首歌係sidetrack，你咁都識，你真係我嘅fans！」獲女神嘉許，文頌男喜滋滋的說：「係呀！我真係好鍾意你！多謝你聽我電話！多謝你同我傾偈！」

Stephy說一直有留意文頌男的報道，「我好想同你傾吓偈、鼓勵吓你，想你同我分享你嘅嘢。我欣賞你嘅堅強同努力，你真係要加油加油加油！我成日覺得人嘅意志力係好勁，呢個世界太大，我哋係見唔晒，有時我瞇埋眼，感受到世界，係比我哋見到嘅更大。所以你覺得辛苦時，試吓瞇埋眼，深呼吸，感受吓比你見到嘅更加強大嘅世界。」

Stephy更說如有機會見面，可以和文頌男一起唱《他不准我哭》時，文頌男更喜上眉梢，一臉傻笑，不敢置信的說：「好呀！係咪㗎？我都想同你講，我好欣賞你，知道你做好多公益活動，例如今次你知我病咗，你會特登同我傾吓電話。」文頌男聲聲感謝，Stephy說一切是緣份的牽引：「唔好客氣，呢個係我同你嘅緣份，令我哋傾電話，或者係將來一齊唱歌或合作，話唔定㗎！你要加油！」

馬浚偉：陪你行嘅人好多

除了心愛的偶像Stephy來電鼓勵，現為新城電台首席營運總監的藝人馬浚偉，之前在Facebook得知黃庭桄訪問文頌男，即答應跟文頌男打氣。在直播中馬浚偉突然「現身」，再令文頌男驚喜不已，更直言馬浚偉是他「由細睇到大」：「我記得你有唱《放學ICU》！」馬浚偉笑說自己年長，在1993年入行時，文頌男還未出生！

馬浚偉在電話中細心詢問文頌男的病況後，更分享因母親也患癌，故明白文頌男抗癌路上當中的不易：「我知道心情係影響好大，你心情好，打贏嘅機會更大。就算個個同你講努力，但當中病痛帶來嘅難捱，係只有你自己知，但你要記住錫你嘅人，心靈上嘅痛，同你嘅痛都不遑多讓，陪你行嘅人好多。最重要係要接受，諗得積極啲，唔好成日諗住自己有病，幫自己做啲有生產力嘅嘢，畀啲嘢自己做。」他更邀請文頌男擔任譚玉瑛主持的電台節目。

女神Stephy的窩心鼓勵，馬浚偉的熱心建議，還有昔日同事的心意援助，更令文頌男在抗癌路上，從不感到孤單。「以前嘅J2同事好好，大家合作大約一年，平時唔會成日約出嚟玩，但令我最感動，係佢哋知我病，提供好多幫助，佢哋人工唔多，都捐少少錢畀我。又會打嚟關心我，雖然口講話自己無聊打嚟，但我知佢哋係關心我，擔心我亂諗嘢。」

只想痛少一點

灰色的童年，捉襟見肘的家境，文頌男咬實牙根，不想當街童，靠自己改變命運，努力完成大學課程後，以為可向夢想進發就是另一個天地，可是突如其來的病，崩潰了。「以前覺得關關難過關關過，讀完書出嚟終於做嘢，去到依家有個咁大嘅衝擊，真係有『係咪連個天都咁想我死？』嘅感覺，係崩潰同掙扎。」文頌男說。

積極抗病的背後，曾經歷意志消沉，天昏地暗，正常不過，文頌男說：「個病令我好痛，行動不便，瞓唔到，出唔到街，令我冇晒社交生活。有段時間，我有諗過，咁樣落去，真係活得好冇意義。好快走出咗呢個死胡同，諗返自己其實仲擁有好多，仲可以舒舒服服，仲有朋友嚟關心我，好快就冇負面諗法困擾自己。我始終要活下去，與其負面面對，不如享受依家我擁有嘅嘢。可以同朋友一齊玩一齊傾偈，唔開心嘅嘢，諗嚟都冇用。」

此刻，文頌男盼望的，是痛少一點。坐着痛，要跪着；睡到正濃時痛醒，要側睡才稍為減輕痛楚；針炙？趴着半小時也吃不消，根本做不到。雖難關重重，深信有呼吸就有希望，文頌男努力的活着，你呢？

文頌男訪問足本睇！

東周網YouTube：https://youtu.be/FPehLWGut0M?si=7-_ImZyJK-EIBHXt

東周網FB直播重溫：https://fb.watch/rR8Ql41vAk/

想向文頌男伸出援手，可捐款到以下文頌男的個人戶口，給他多一分力量。

滙豐銀行HSBC
506-231778-292
Chan Man Nam Clark（是文頌男的真名）