發佈時間：16:12 2025-07-19
颱風「韋帕」殺到，明日（20日）凌晨甚至有機會改掛八號烈風或暴風信號。不少市民昨晚已聞「風」而動，湧至超市買菜，多區網民紛紛上載圖片，展示蔬菜被掃光的畫面，有大埔居民更指看到有「師奶買咗十幾包菜」。不少網民都認為情況誇張，有人揶揄「唔知以為呢個風球維持10日」。
樓主：香港打風真係唔會餓死
昨晚有多名網民在facebook群組和社交平台Threads上，分享不同地區超市菜架空空如也的相片，留言「打風前必見嘅經典場面」、「要振興香港經濟其實好簡單，天文台掛多幾次打風咪多囉，咁早就搶購一空」。
一名網民也於晚上8時許，在facebook群組「大埔 TAI PO」發圖及留言﹕「其實香港打風真係唔會餓死㗎，可唔可以唔好咁癲呀？見到啲人成車成車咁樣買，唔知以為呢個風球維持10日」。樓主隨後在回應欄補充﹕「根本唔需要搶，打嗰一日風，屋企點都有嘢食。」「超市其實每一日都有菜返。」
網民：見到有個師奶買咗十幾包菜
有網民回應時也指﹕「食少日菜使死咩？」「樓下街市8號都照價賣。」「我見到有個師奶買咗十幾包菜！」「我頭先喺超市連蔥都無條，全吉」。之後有人上載相片和應﹕「我6點前到，仲有一條蔥。」
有網民則笑稱，「香港打風就成個月。要買定一個月貨」，「證明香港人好幸福，未見過真正嘅災難」。有人則感嘆﹕「由阿媽嗰個年代，證明香港人幾十年都無變過！以前真係全港停市，但依家8號都有火車啦！！大佬！打風啫，唔係打仗呀！！」
網民分析：執輸行頭慘過敗家
另有網民對這種囤菜心態表示不理解：「買3、4斤都可以理解，頂一兩日，但一到打風啲人就特別鍾意食菜，十幾斤咁掃返屋企，擺到爛都未食得晒。」有人則冷靜分析﹕「執輸行頭慘過敗家，個個都怕蝕底，如果唔係啲老千點解仲生存到啫，就係咁嘅原因。」
另一邊廂，也有網民認為這是有備無患﹕「打風冇菜賣，唔買定咁邊度有菜食呀」、「可能屋企多人食飯；同埋打完風，啲菜唔靚又會貴少少」。
資料來源：facebook群組「大埔 TAI PO」、Caleb Au＠facebook群組「將軍澳主場」 、makchm＠Threads、davidfitness812＠Threads
