發佈時間：13:00 2025-11-02
縱橫演藝界半個世紀的影帝任達華，在電影演繹過無數經典角色，無論是《PTU》的霸氣阿sir、《歲月神偷》忠厚老實的基層鞋匠、或是《黑社會》心狠手辣的社團大佬，他總會將角色演得立體、細膩。
人生大部分時間，都在演藝路上不斷求突破的他，閒時喜歡攝影，近年又愛上了繪畫，並以眼睛為靈感，創作出大量抽象風格的水墨和油畫作品。近日他在大館舉行《炫目．任達華》畫展，用藝術分享心目中的美麗世界。
他說：「喺我啲畫入面，全部都係BB，有大大小小好多眼睛，因為眼睛係人與人、人與事物之間的聯繫，及人與世界的生命延續，所以除了創出2025年BB看見的事物，我亦創造1000年後，幻想3025年BB看到的世界，大家睇畫的同時，畫入面的眼睛亦睇住你，感覺有種互相交流的微妙情感。」
3025年色彩
任達華的畫展上周在中環大館F倉展廳舉行，展出十多幅「炫目」畫作，「《炫目》主題源於每幅作品都係以眼睛傳遞不一樣的世界，就像拍攝電影時最講究神髓，很多時也要用眼神去交代。我希望透過不同顏色，以眼神為主題的作品，為大家帶來一場氛圍獨特的藝術體驗。」
今次他展出的「炫目」系列，既有原始的水墨畫，又有色彩豐富的油畫，他說：「就像BB仔未開眼，個世界係黑白的；又好似6、70年代，小時候睇的電視係黑白一樣，到後來開始有彩色電視，眼中的世界慢慢變得色彩繽紛。你睇這裏每一幅畫，都係我幻想虛構創造出來的BB，水墨畫係2025年BB睇到的世界，之後我幻想1000年後佢會睇到啲乜？於是再以油畫創作出3025年BB眼中的彩色世界。」
在他的畫筆下，水墨和油畫同樣手到拿來，「我靈感一嚟，就畫得好快，最初畫水墨，是喜歡墨水流動的不確定性，就如我的人生一樣，不斷遊歷世界各地。到後來畫油畫，都是我在生活和旅行時見到的繽紛色彩，我將之作為創作靈感，融入這些作品裏。」
母親的溫暖
其中兩組各由八幅畫組成的巨型畫作，是展覽中的亮點，當中以紅色作主調的一幅，是以其太太琦琦為創作靈感。「初初識佢，有次見佢側面，帶咗大耳環，覺得好靚，呢幅畫就以當時的記憶，再用水墨畫了一圈來作開首構圖，再用上鮮艷的紅色，成幅畫其實用八塊畫組合而成，巧妙之處係2025年這拼合，到2026年可以折散重新組合，到2027年又可以再有新變化，加埋對面兩幅畫共16塊，亦可以互相對應組合，好似砌puzzle咁，係一種幻想中的美學，亦比喻我們遇到任何困難，都可以用自己雙手、雙眼，去創造出新天地，即使再過16年、26年，甚至30年，都可以有轉變，擁有無限可能性，用藝術變成永遠。」
展覽除了展出個人畫作，他更聯乘多位時裝設計師，包括劉志華、冼美玉、任朗呈和品牌 PONDER ER. 創辦人Derek、著名刺繡藝術家周雪清，及太平地氈，以跨界藝術將其2D畫作，製作成時尚服飾、刺繡畫和巨型地氈，以立體藝術呈現出來。「有些是來自我在60年代的童年情感，其中刺繡畫的概念，是那些年媽媽經常幫我補衫的溫暖回憶；而踏在地氈上的暖，則令我聯想起當年赤腳四圍走的經歷。」
太太送畫室
一直以來，外界對任達華的印象是一位資深演員，也熱愛攝影，而畫畫興趣卻是他近年才開始培養，「其實我細路仔的時候，已經有鍾意畫畫的潛意識，但一直埋藏在心裏面，到長大後因不斷拍戲，冇時間去探索，直至早幾年疫情多了空檔，當時諗番起童年時一些影像，就嘗試拎起支畫筆創作，自此越畫越多。」
由演員變身成藝術創作者，他笑言是無師自通，「我冇正式跟繪畫老師學習，冇經過傳統訓練，唔識素描，又唔識畫人像，我創作嘅畫，純粹係攞起畫筆，用自己當時心情同情感去畫。」
起初他多在家中作畫，到現在，他已在柴灣擁有一間1600呎的studio作畫室，「有段時間興起就畫，屋企都俾我搞到亂晒龍，牆上仲越來越多『雀班』，後來太太同個女就夾份買咗個studio俾我。所以多年來無論拍戲或畫畫，我都好感謝屋企，因為我成日都要出咗去，佢哋都容許我這種『分離』，而太太同個女亦好支持我。記得佢哋第一次見到我啲畫，大叫wow wow wow，俾到我好大滿足感，我喺未來日子，喺藝術路上都會繼續放任地前行。」
延伸內容：《愛．回家》風少陳浚霆出道十年 回歸樂壇 邀任達華拍首個MV
《東周網》訪談系列節目《星桄伴我心》10月重磅嘉賓：
即睇：湯令山失戀情歌點擊破1500萬 坦認喊住唱 揭Wyman教做人智慧 爆生得唔高謎團 曾擔心生計做某件事
即睇：鍾鎮濤與范姜「姜濤戀」有火花對談 拍《巨塔之后》床上戲心得
即睇：陳煒回首離婚情傷陰霾 親授少女味保鮮心得 細訴入行30年樂與淚
立即追蹤《東周刊》全新WhatsApp頻道，緊貼全城熱話、突發猛料、獨家消息！
