發佈時間：19:58 2024-10-29
TVB台慶劇《黑色月光》昨晚（28日）首播，劇集在港未播出，已知道不少劇情尺度大，好似首集一開場，就講彭懷安（Eddie）抱住鄧伊婷「激戰肉搏」，還揭發Eddie因被偷拍而對鄧伊婷拳打腳踢。鄧伊婷回想此幕，曾被Eddie錯手真打了2、3次，一Cut機時真的痛到標眼水，慶幸這痛楚令她演得更逼真。
延伸閱讀：黑色月光丨林夏薇王浩信激烈床戲 濕吻狂咀 火辣場面逐格睇
抱到冇晒力
今次鄧伊婷的「瞓身見紅」演出獲網民大讚，同時亦笑指Eddie做番壞人相當有Feel：「佢做好人始終適應唔到。」鄧伊婷受訪時透露，相關場口難度甚高，亦相當考驗體力，她解釋：「開場段戲講Eddie由廳抱我入房，雖然個鏡頭得一秒左右，但因為要就返航拍機拍攝，我哋足足拍咗幾個鐘，佢抱我都抱到冇晒力。」
獻螢幕初吻
而鄧伊婷「苦等」多年的螢幕初吻，竟然在此劇獻給了Eddie。當她向朋友透露對象是「Eddie Pang」時，朋友竟誤會是台灣型男彭于晏，相當搞笑！談到遭Eddie拳打腳踢，她坦言：「其實Eddie仲緊張過我，好彩我哋之前拍《狀王之王》時熟咗先冇咁尷尬。我有叫佢唔好留力、照做，我自己會識避開，但最終佢都係唔小心真打咗我2、3次，一Cut機時我真係痛到標眼水，但我覺得個痛楚反而令件事更逼真，因為好多人見到我畀人打都好似好興奮咁，哈哈！」
嚇到有啲驚
由於這場戲講Eddie出手勁重，一度以為自己錯手殺咗鄧伊婷，遂即時搵公關一姐楊茜堯出手拆局。楊茜堯一到現場，即安排手下「質」鄧伊婷食藥，並吩咐同事遙距起她底及截停趕來的傳媒，最後以氣定神閒又咄咄逼人的手法，着鄧伊婷交出床照的雲端Password，完美善後。鄧伊婷拍這場戲時，直指楊茜堯氣場好強：「因為佢《宮心計》姚金鈴個角色，一直令我有啲驚佢，到真係拍時，佢啲氣場真係嚇到我，但亦多謝佢帶我入戲。」
同場加映
用1.5小時變都敏俊
飾演金融界奇才「成風」的王浩信，昨晚為了幫好友張頴康對付尹揚明，喬裝硬闖蔣氏記者會現場，他的齊蔭頭不但搶眼，有網民更笑指望落有點像金秀賢在《來自星星的你》中的「都敏俊」，並即時將他劇中名字改為「都敏風」。原來今次王浩信是罕有挑戰暖男角色，為了每次出場都予人一表人才的觀感，他每日埋位開工前，至少花1.5小時來粉飾造型，他笑言：「之前最多都係用45分鐘整劇集造型，但今次花嘅時間係以往拍劇嘅1.5倍，要求真係好高！」
葉蒨文楊卓娜撞樣
至於飾演余氏姊妹楊卓娜、楊茜堯和黃翠如的年青版角色，分別是葉蒨文、廖慧儀及區明妙。昨晚播出三人昔日與家人開心慶祝的片段，網民竟稱讚3位年青演員既演得好，仲有啲似樣，真係好似3姊妹。當中以出名與楊卓娜撞樣的葉蒨文最為吸睛，她與楊卓娜撞樣程度，令不少網民一度以為3人當中，只有楊卓娜同時分飾兩角。
