發佈時間：11:00 2026-05-24
80年代的前無綫當紅藝人崔加寶（前名崔嘉寶），自嫁給晨曦足球隊班主周文曦後，便息影相夫教子，3名子女轉眼間已長大成人，並且各自擁有自己的一片天，大仔在內地從事時裝生意，二女則於加拿大的教育界發展，而現年25歲的孻仔周志賢（Dave），由媽咪發掘潛質，搖身一變成為蜚聲國際的男模。
踏入模界5年，Dave除了由825元歐羅（約7,600港元）身價，「升呢」至今日5位數一場時裝騷之外，還見盡內裏的繁華風光和頹靡，更曾被引誘吸毒，但他企硬拒絕，堅守自律！而他更為自己定立一個目標：「我心中有個最終目標，就係代表香港，成為一個可以企穩國際市場的香港男模特兒。」
出奇制勝
個性內向害羞的周志賢（Dave），18歲時遠赴英國升學，但在疫情期間，世界停擺，因媽媽崔加寶（前名崔嘉寶）察覺他眼睛細細、身形高瘦，甚有模特兒的特質，遂建議他不妨去模界一試，結果他由學生哥誤打誤撞做了國際模特兒，主打在歐洲行時裝騷；而他走的都是大品牌，例如：D&G、Dior、Louis Vuitton等。
2021年，Dave首獲意大利模特兒公司簽約，一個人拎住行李留在當地3個月，每次有面試，都要過五關斬六將，他憶說︰「每次排隊面試至少3個鐘，因為好多模特兒排，第一次就擺低張comp card、見你真人；第二次就影大頭相；第三次就行俾佢哋睇；第四次就俾設計師睇吓你。若果ok，下一日就試衫。開騷前一日就再度身訂造衫。我第一個工作就係喺米蘭行騷，呢行咩都好緊逼，一日有成12個面試，我試過由凌晨5點至晚上11點，冇停過咁去面試。」
狂練model walk
模界靚仔靚女多，競爭相當大，幸好Dave珍惜每次機會，故無時無刻行街都在練model walk，兼夾日日健身操肌，以及長期控制飲食保持體形，希望每一次面試都以佳狀態示人。有時，他還會出奇制勝︰「𠵱家多咗啲經驗，有時撞見好多亞洲人同時在排隊面試，我咪隔一陣先排，等到其他人種，例如黑白人多在排隊，見得我一個亞洲人，咪突出啲。」 他這招的確奏效，從中提升了被挑選中的機會。
初生之犢進軍模界，不經不覺已5年，Dave累積了不少經驗，除行天橋外，也會跟品牌合作，身價亦由最初的825歐羅（約7,600港元）一場騷，飆升至現時5位數字歐羅。不過，置身在華衣美服的繽紛世界，他也見盡人性的奢華和糜爛，問及有否遇過模界的混亂男女關係和毒品？他不諱言︰「一定有見，要學識say no。試過有人問我要唔要試吓（毒品）？我話冇興趣，跟住我會同佢保持距離！呢行係好易迷失，錢來得快，冇人睇住，好易行差踏錯。我堅持要留意後果，做番自己，我唔想嘥咗自己嘅人生。
教師女友
出生在金牛座的Dave，為人踏實穩定，做事有部署，深知模特兒工作有時限，故已同步開創不同業務，為未來鋪路。「我𠵱家25歲，喺呢行算係老，每年都好多新人。而我搵到嘅錢，全部都儲起，因為趁後生，咩都試吓。由於模特兒時間好多，我同朋友有一齊搞event business，又會做DJ打碟，仲有搞時裝品牌，預年底推出。其實，我呢啲生意都唔使點拎錢出嚟，之前做過兩、三次活動。不過，現時都係以模特兒工作行先，我心中有個最終目標，就係代表香港，成為一個可以企穩國際市場的香港男模特兒。」
對事業有規劃，Dave在感情方面一樣有分寸，現時跟台灣籍女友拍拖約半年。他透露女友大眼、長髮、貌似Angelababy、任職小學教師︰「係朋友介紹識，佢好爽快，唔扮嘢，對我好好。因為佢，我開始聽電子音樂，佢帶動我好多。」他還大方介紹給媽媽認識，崔加寶對女方也有讚冇彈：「個女仔好細心、思想成熟。」並爆兒子是「廿四孝男友」，每朝6點會送女友返工。
問及何時成家立室，Dave坦言︰「想早啲生，唔想有代溝，但首先要有能力，賺到錢先會結婚，或者30歲前。」而他憧憬的婚禮，最好在沙灘進行，一切從簡。現時以英國為基地的Dave，因方便飛其他歐洲國家工作，但每年都會抽時間回港探望家人，稍後又要飛米蘭開工，他表示早已習慣，隨時ready，即刻進入工作mode。所以說，機會永遠是留給有準備的人。
延伸內容：崔加寶 鍾淑慧 王綺琴 三個女人一個騷
延伸內容：57歲崔加寶潮爆粉紅pink lady頭 逆齡打扮勝當年
